Ֆրիտյոֆ Նանսենի ծննդյան 150-ամյակին նվիրված միջոցառումներ Աթենքում

  Հոկտեմբերի 10-ին եւ 11-ին Աթենքում տեղի ունեցան նորվեգացի ականավոր հումանիստ, բեւեռախույզ, գիտնական, դիվանագետ, խաղաղության Նոբելյան մրցանակի դափնեկիր Ֆրիտյոֆ Նանսենի ծննդյան 150-ամյակին նվիրված միջոցառումներ, որոնք անցկացվեցին Հունաստանի Հանրապետության նախագահ Կարոլոս Պապուլիասի բարձր հովանու ներքո:

Հոկտեմբերի 10-ին Աթենքի ակադեմիայում կայացավ գիտաժողով, որը նվիրված էր 1922-24թթ. հույն գաղթականների խնդիրների լուծման եւ հումանիտար ճգնաժամի հաղթահարման ուղղությամբ Նանսենի ծավալած գործունեությանը: Գիտաժողովը կազմակերպել էր Հունաստանի Մարդու իրավունքների պաշտպանության կենտրոնը Հունաստանում Նորվեգիայի եւ Հայաստանի դեսպանությունների, նորվեգական ինստիտուտի եւ փախստականների հարցերով ՄԱԿ-ի գերագույն հանձնակատարի աթենքյան գրասենյակի հետ համագործակցությամբ:

Ելույթ ունեցողները բարձր գնահատեցին Ազգերի լիգայի` փախստականների հարցերով առաջին հանձնակատար Ֆրիտյոֆ Նանսենի գործունեությունը, նրա անխոնջ նվիրումը ինչպես հույն, այնպես էլ ցեղասպանությունից մազապուրծ հայ գաղթականների իրավունքների պաշտպանության, նրանց նանսենյան անձնագրեր տրամադրելու, համաշխարհային հանրության ուշադրությունը նրանց հոգսերի ու խնդիրների վրա սեւեռելու գործում: Անդրադարձներ եղան նաեւ նորվեգացու դիվանագիտական, գիտական, մարզական եւ այլ գործունեությանը:

Հոկտեմբերի 11-ին Աթենքի կենտրոնական թաղամասերից մեկում տեղի ունեցավ Նանսենի կիսանդրու բացման հանդիսավոր արարողությունը: Կիսանդրին տեղադրվեց նույն պուրակում գտնվող հայկական խաչքար-հուշակոթողի անմիջական մերձավորությամբ:

Միջոցառումներին մասնակցեցին Հունաստանում ՀՀ դեսպանության եւ հունահայ համայնքային կազմակերպությունների ղեկավարներն ու ներկայացուցիչները. ԱԳՆ հաղորդագրության տվյալներով։