«Իմ Քայլի» գործարար պատգամավորները

Վարչապետ Նիկոլ Փաշինյանն իր վերջին ուղիղ եթերներից մեկում հպարտորեն հայտարարում էր, որ հետհեղափոխական Հայաստանի խորհրդարանի իշխանական մեծամասնության մեջ չկան բիզնեսմեն պատգամավորներ և հենց այստեղ է որակական տարբերությունը նախկին խորհրդարաններից: Վարչապետի հայտարարությունը, մեղմ ասած, տարակուսանք է առաջացնում այն պարզ պատճառով, որ հենց վարչապետի թիմակիցներն իրենց իսկ շուրթերով հայտարարում են, որ իրենք գործարարներ են և չեն էլ փորձում թաքցնել, որ ԱԺ-ում սեփական բիզնես շահերի լոբբինգով են զբաղված: Դիցուք՝ պատգամավոր Տիգրան Կարապետյանը, ով բառացի է հայտարարել, որ ինքը գործարար է, «Գորիս Գամմա» ընկերության համասեփականատերերից մեկն է: 

Պատգամավոր Անուշ Բեղլոյանը «Հանրային Հաղորդակցություն Լաբորատորիա» ՍՊԸ-ի 33 տոկոս բաժնետերն է:

 
Պատգամավոր Նազելի Բաղդասարյանը «Սթայլ Մեդիա» ՍՊԸ-ի սեփականատերն է: 

Բաբկեն Թունյանը, ըստ պետական ռեգիստրի, հանդիսանում է «Բեվիտ» ՍՊԸ սեփականատերերից մեկը: 

Ալեքսանդր Ավետիսյանը՝ «ՌԷՄ գովազդային գործակալություն» ՍՊԸ-ի 19%

և «Նախընտրական տեխնոլոգիաներ» ՍՊԸ-ի 100% բաժնեմասերի սեփականատերն է: 

Ստացվում է՝ կամ Փաշինյանը տեղյակ չէ, որ իր հարազատ ֆրակցիայում բիզնեսով զբաղվող պատգամավորներ են հանգրվանել, կամ էլ հերթական անգամ ապակողմնորոշում է հանրությանը՝ փորձելով որակական տարբերություններ մատնանշել իր քաղաքական թիմի և նախկինների միջև, մինչդեռ այդ տարբերությունները, կարծես թե, գնալով մինիմումի են հասցվում…