Բեժանյանների ընտանիքը թե՛ Կառավարության, թե՛ անձամբ Աննա Հակոբյանի ուշադրության կենտրոնում է

Հայաստան 26 Ապրիլ, 2020 20:00

Գոհար Բեժանյանը, որը հանրությանը հայտնի դարձավ ամիսներ առաջ իր 12-րդ զավակին լույս աշխարհ բերելով, այժմ շատ ընտանիքների պես դժվարին կացության մեջ է հայտնվել։ Եթե ամիսներ առաջ այս ընտանիքի գլխավոր երազանքը սեփական տուն ունենալն էր, ապա այժմ վարձով բնակարանից չզրկվելու և օրվա հացի խնդիր ունեն։

Տասնյակ լրատվամիջոցներում հրապարակված նյութերից ու ռեպորտաժներից հետո Բեժանյաններին այցելեց ՀՀ վարչապետ Նիկոլ Փաշինյանի կինը՝ Աննա Հակոբյանը։ Գոհար Բեժանյանը Sputnik Արմենիային հայտնեց, որ Աննա Հակոբյանի այցից հետո նրա կարգադրությամբ մուծվեց ընտանիքի մեկ ամսվա գազի վարձն ու երկու ամսվա տան վարձը։ Գոհարն օգնության համար շնորհակալ է տիկին Հակոբյանին, սակայն արտակարգ դրության պատճառով ընտանիքի հայրն այժմ աշխատանք չունի, իսկ մինչև մայիսի 10-ը պետք է հերթական անգամ մուծեն տան վարձը։ Դրանից բացի, տանը եղած սննդի պաշարն էլ է վերջանում։

ՀՀ վարչապետի տիկին Աննա Հակոբյանի մամուլի խոսնակ Հասմիկ Հարությունյանը գրել է.

«Մի շարք ընկերներիս մոտ տեսա, որ դրամահավաք է սկսվել 12 երեխա ունեցող Բեժանյանների ընտանիքին օգնելու համար։ Բազմազավակ ընտանիքին աջակցելուն ուղղված յուրաքանչյուր գործողություն միայն ողջունելի է, սակայն, հաշվի առնելով մի շարք շահարկումներ, հարկ ենք համարում Բեժանյանների ընտանիքի հետ կապված մի քանի մանրամասներ ներկայացնել։

Բեժանյանների ընտանիքին տրամադրվել է 2 ամսվա՝ (մարտ և ապրիլ ամիսների) տան վարձը և փետրվար ամսվա գազի վճարը։ Մայիս ամսվա տան վարձը նույնպես կտրամադրվի։

Այլ օգնություններ նույնպես եղել և լինելու են, որոնց մասին չենք բարձրաձայնի։

Ինչ վերաբերում է բնակարանին, ապա այս տարի փետրվարի 21-ին Բեժանյանների բնակարան այցի ժամանակ առաջարկվել է բնակարան Երևանին հարակից մարզերից մեկում։ Սակայն ընտանիքի անդամները նշել են մի շարք անհարմարություններ և չեն ցանկացել մարզում ապրել։

Առաջարկվել է աշխատանք ընտանիքի հորը, սակայն կրկին որոշակի առողջական խնդիրներից ելնելով աշխատանքի առաջարկությունը մերժվել է։

Ընթացքի մեջ է ընտանիքի մի քանի երեխաներին բժշկական օգնություն տրամադրելու հարցը։

Բեժանյանների ընտանիքը շարունակում է մնալ թե՛ Կառավարության, թե՛ անձամբ ՀՀ վարչապետի տիկին Աննա Հակոբյանի ուշադրության կենտրոնում։
Ներկա դրությամբ փնտրվում է լավագույն լուծումը Բեժանյանների ընտանիքին բնակարանով և աշխատանքով ապահովելու համար»։