Սերգո Կարապետյանը ներկայացրեց միջոցառման մանրամասները

  ՀՀ անկախության 20-րդ տարեդարձի միջոցառումների շրջանակներում հոկտեմբերի 14-16-ը անցկացվող հայ ֆերմերների առաջին «Ագրոֆորումի», ինչպես նաև առաջին անգամ նշվող ՀՀ գյուղատնտեսական աշխատողի օրվա տոնակատարության միջոցառումների առիթով այսօր ՀՀ գյուղատնտեսության նախարարությունում հրավիրվել էր մամուլի ասուլիս: Լրագրողների հետ հանդիպման ժամանակ ՀՀ գյուղատնտեսության նախարար Սերգո Կարապետյանը ներկայացրեց միջոցառման կազմակերպման մանրամասները՝ ասելով, որ յուրաքանչյուր տարի հոկտեմբեր ամսվա երրորդ կիրակի օրը նշվելու է որպես «Հայաստանի Հանրապետության գյուղատնտեսության աշխատողի օր»։ Այդ առիթով անցկացվելու են մի շարք միջոցառումներ, այդ թվում՝ տոնավաճառներ, ցուցահանդեսներ, «բերքի տոներ», համերգային ծրագրեր, հրավառություն և այլն: Համաժողովի գործնական մասը կանցկացվի Կ. Դեմիրճյանի անվան մարզահամերգային համալիրում, իսկ տոնական միջոցառումները՝ Հյուսիսային պողոտայում, որտեղ կազմակերպվելու է նաև գյուղատնտեսական ապրանքների՝ գինու, պանրի, պահածոների և մեղրի համտես: Համտեսների համար յուրաքանչյուր մարզին կհատկացվի հինգ տաղավար, որտեղ գյուղացիական տնտեսությունները և վերամշակող կազմակերպությունները կներկայացնեն սեփական արտադրանքը: Համաժողովին կմասնակցեն շուրջ քառասուն սփյուռքահայ ֆերմերներ՝ Ռուսաստանից, Ուկրաինայից, Վրաստանից, Լիբանանից և այլ տեղերից: Միջոցառումների շրջանակներում հանդիպում կլինի սփյուռքի նախարարության հետ: ՀՀ գյուղատնտեսության նախարար Սերգո Կարապետյանը նշեց, որ այս ամենի նպատակն է ստեղծել համահայկական ընկերակցություն ագրոպարենային բնագավառի գործարարների և ֆերմերների միջև: