Իրանում Հայաստանի դեսպանը հանդիպել է Արևելյան Ատրպատականի նահանգապետի հետ

ԻԻՀ-ում ՀՀ դեսպան Գրիգոր Առաքելյանը Իրանի Արևելյան Ատրպատականի նահանգապետ Ահմադ Ալիռեզա Բեյգիի հետ Թավրիզում տեղի ունեցած հանդիպման ժամանակ փոխանցել է Իրանում տեղի ունեցած ավերիչ երկրաշարժի կապակցությամբ ԻԻՀ Արևելյան Ատրպատականի նահանգապետին հասցեագրված Սյունիքի ու Տավուշի մարզպետերի ցավակցական ուղերձները և նշել, որ երկրաշարժից տուժածներին օգնություն ցուցաբերելու նպատակով Երևանից 5 բեռնատար ավտոմեքենա է մուտք գործել Իրանի տարածք:

Ըստ ՀՀ ԱԳՆ-ի` նահանգապետ Բեյգին, շնորհակալություն հայտնելով Հայաստանի ցուցաբերած օգնության և հղած ջերմ խոսքերի համար, հայտնել է, որ նման իրավիճակներում այլ երկրներից առաքվող օգնություններն անչափ կարևոր և արժեքավոր են:

Նահանգապետը տեղեկացրել է, որ երկրաշարժի հետևանքով, որի ուժգնությունը չէր զիջում 2003 թվականին իրանական Բամ քաղաքում տեղի ունեցած երկրաշարժին, ավերվել է Արևելյան Ատրպատականի 314 գյուղ, իսկ տուժածների թիվը գերազանցում է 300.000-ը:

Նահանգապետը նաև հայտնել է, որ ներկայումս 74 հազար հոգի բնակեցվել Է վրանային ճամբարներում, և արդեն մեկնարկել են շուրջ 22 հազար հոգու համար նախատեսված մշտական բնակարանների շինարարական աշխատանքները:

ՀՀ ԱԳՆ