Հայաստանը կիսակոնսոլիդացված ավտորիտար համակարգով պետություն է. Freedom House

Freedom House իրավապաշտպան կազմակերպությունը հրապարակել է հետխորհդային եվրասիական 29 երկրներում ժողովրադավարական զարգացումներին նվիրված «Nations in Transit» զեկույցը, ըստ որի՝ Հայաստանն արձանագրել է Freedom House-ի զեկույցի պատմության մեջ ժողովրդավարության բարելավման ամենաբարձր երկամյա ցուցանիշը:

«Հայաստանը գրանցել է զեկույցի պատմության մեջ երկամյա ժողովրդավարության ամենաբարձր ցուցանիշը և արդյունքը հասել է երկրի համար իր առավելագույն կետին՝ ընտրությունների անցկացման և կոռուպցիայի դեմ պայքարի ոլորտներում գրանցված առաջընթացով: Դատական ​​համակարգի հետ կապված զարգացումները, այնուամենայնիվ, մտահոգությունների տեղիք են տվել»,- նշված է զեկույցում:

Freedom House-ի փորձագետները զեկույցում անդրադառնում են քաղաքական այն իրավիճակին, որ տիրել է Հայաստանում 2018 թվականի հեղափոխությանը անմիջականորեն նախորդող ժամանակահատվածում:

«Նախագահական ժամկետի ավարտից հետո Սերժ Սարգսյանի` ընդլայնված լիազորություններով օժտված վարչապետի պաշտոնը ստանձնելու փորձը հանգեցրեց զանգվածային բողոքի ակցիաների: Քաղաքացիները հիասթափված էին Հայաստանի տնտեսության լճացումից և ոչ ժողովրդավարական քաղաքական համակարգից: Ի վերջո, Սերժ Սարգսյանը 2018 թվականին ստիպված եղավ հրաժարական տալ: Նրան փոխարինելու եկավ նոր կառավարությունը, որը նախկին իշխող կուսակցությանը խորհրդարանական ընտրություններում ջախջախելուց հետո ձեռնամուխ եղավ նշանակալի ժողովրդավարական բարեփոխումների իրագործմանը», - նշում են Freedom House-ի փորձագետները:

Freedom House-ը կոչ է անում ուշադրություն դարձնել կառավարման համակարգի անցումային փուլում գտնվող երկրներին՝ առանձնացնելով Հայաստանն ու Ուկրաինան, որոնք վերջին երկու տարիներին արձանագրել են ժողովրդավարացման բարձր ցուցանիշներ: 

«ՀՀ վարչապետ Նիկոլ Փաշինյանը և Ուկրաինայի նախագահ Վլադիմիր Զելենսկին կբախվեն վստահության ամրապնդման, իրենց հետ կապվող հույսերն արդարացնելու, կոռումպացված համակարգերն առանց ժողովրդավարական նորմերի ոտնահարման վերակառուցելու դժվարին մարտահրավերներին», - գրում են փորձագետները:

Անդրադառնալով Ամուլսարի ոսկու հանքի խնդրին՝ փորձագետները գրում են, որ այն իսկական գլխացավանք է դարձել ՀՀ վարչապետ Նիկոլ Փաշինյանի համար.

«Հայաստանում Ամուլսարի ոսկու հանքի շահագործման շուրջ առաջացած տեղացիների անհանգստությունը գլխացավանք է դարձել վարչապետ Նիկոլ Փաշինյանի համար, ով ժառանգել է ծրագիրը կոռումպացված կառավարությունից, որը վտարվեց 2018 թվականի հայտնի բողոքի ակցիաների արդյունքում: Ակտիվիստներն ամիսներով փակել են հանք տանող ճանապարհները, նրանք ասում են, որ Փաշինյանը կապացուցի, որ ոչնչով չի տարբերվում այն ղեկավարներից, որոնց ինքը փոխարինել է, եթե կանաչ լույս վառի ծրագրի համար»:

Այնուամենայնիվ, Freedom House-ի կողմից ներկայացված քարտեզում Հայաստանը բնորոշվում է որպես կիսակոնսոլիդացված ավտորիտար համակարգով պետություն: