Համագործակցություն ԱՄՆ Միջազգային զարգացման գործակալության հետ

ՀՀ աշխատանքի և սոցիալական հարցերի նախարար Ա. Ասատրյանն ընդունեց ԱՄՆ Միջազգային զարգացման գործակալության և «Սեյվ դը չիլդրեն» կազմակերպության պատասխանատու աշխատակիցների: Հանդիպման նպատակը «Հաշմանդամություն ունեցող անձանց կենսամակարդակի բարելավումը զբաղվածության խթանման միջոցով» ծրագրի իրագործման ուղղությամբ կատարված աշխատանքների ներկայացումն էր: Ծրագիրն իրականացնելու է «Սեյվ դը չիլդրեն» կազմակերպությունը՝ ԱՄՆ ՄԶԳ-ի ֆինանսավորմամբ, 2012-14 թվականներին Երևանում, Արարատի, Գեղարքունիքի, Լոռու և Շիրակի մարզերում միջազգային և տեղական հասարակական կազմակերպությունների, «Զբաղվածության պետական ծառայություն» գործակալության, զբաղվածության տարածքային կենտրոնների, տեղական և մարզային իշխանությունների, միջին մասնագիտական կրթական հաստատությունների սերտ համագործակցությամբ: Ծրագրի նպատակը հաշմանդամություն ունեցող անձանց զբաղվածության հավասար հնարավորություններ և աշխատանքի մատչելիություն ապահովելն է, ռազմավարական խնդիրը՝ Հայաստանում հաշմանդամություն ունեցող անձանց աշխատանքային ծառայություններով ապահովելու արդյունավետ մոդելի ստեղծումը:

Լսելով կատարված աշխատանքների հաշվետվությունը՝ պարոն Ասատրյանը նշեց, որ ծրագիրն ունի լրամշակման կարիք: «Անհրաժեշտ է միջոցառումների ծրագիրը և ժամանակացույցը համահունչ դարձնել նախարարության գերակայությունների, մասնավորապես՝ ինտեգրված սոցիալական ծառայությունների ներդրվող համակարգի հետ»,- նշեց նախարարը: Հանձնարարականի կատարմանն անդրադարձ կկատարվի մեկ շաբաթից: