Անցնող շաբաթվա ամենասկանդալային գրառումները

Շարունակում ենք ձեր ուշադրությանը ներկայացնել սոցիալական ցանցերում ՝ պաշտոնյաների ամենասկանդալային գրառումները:

ԼՀԿ պատգամավոր Սրբուհի Գրիգորյանը ֆեյսբուքյան իր էջում գրել է. «Գիտե՞ք՝ ինչն է նաև ինձ մտահոգում։ Վարչապետի խոսքի մի հատված գլխիցս դուրս չի գալիս, թե Սասուն Միքայելյանը շիշը վերցրել էր, Քոչարյանը նրան զինաթափեց, թե չէ կարող էր շշի հարվածով ամեն ինչ վերջանար: Հավանաբար, միջադեպը նկատի ուներ: 
Հիմա մտածում եմ. արժի՞ ամբիոնի մոտ վահանով գնալ: Ես որևէ միջադեպի այսչափ չեմ անդրադարձել։ Ահավոր հիասթափված եմ»: 

ԱԺ նախկին փոխնախագահ, արդարադատության նախկին նախարար Արփինե Հովհաննիսյանը ֆեյսբուքյան իր էջում գրել է․ «Պարո՛ն երեսպաշտ, մի ամբողջ երկու տարի ուշացել ես: Փաշինյանն այսօր իր տարերքի մեջ էր։ Դասական էր ամեն ինչ՝ դեմքի «ահարկու» արտահայտությունը, հիստերիան, բղավելը ու, իհարկե, ցինիզմն ու ստախոսությունը։ ՀՀԿ խոսնակ Էդուարդ Շարմազանովը ֆեյսբուքյան իր էջում գրել է. «Նիկո՛լ, երազածդ «սամասուդը» հասավ Ազգային ժողով: Հիմա էլ ընդդիմադիր պատգամավորներին «սամասուդ» անելու հրահանգ ես տվել, փաստորեն: Քիչ առաջ Ազգային ժողովում տեղի ունեցածը քո կառավարման պատկերն է: Պետությունն այս վիճակին ես հասցրել քո «թաթիկներ կտրելու», «սամասուդ» անելու, «ծեփելու» կոչերով: Երկիրն ու հասարակությունը սարքել ես հայ-ադրբեջանական սահման: Փողոցում քիթ եք ջարդում, պառլամենտում ծեծուջարդ սարքում»: 

«Ժուռնալիստների «Ասպարեզ» ակումբի խորհրդի նախագահ Լևոն Բարսեղյանը ֆեյսբուքյան իր էջում գրել է. «Պարոնա՛յք, ձեզ վայթե արտաքին թշնամի է պակասում։ Գոնե քարտեզին նայեք, այդքան ապուշ կարելի է՞ լինել խորհրդարանում։ Ուրիշ ձև չկա՞ վեճ լուծելու, իմաց տվեք հավաքվենք լուծենք էդ անլուծելի վեճերդ։ Ամոթ ձեզ, ու հարամ էղնի կերածներդ մեր փողերից»։

Շրջակա միջավայրի արդեն նախկին նախարար Էրիկ Գրիգորյանը ֆեյսբուքյան իր էջում գրել է. «Հարգելի հայրենակիցներ, սեփական դիմումի համաձայն ազատվել եմ Շրջակա միջավայրի նախարարի պաշտոնից, ցանկանում եմ հանդես գալ վերջին երկու տարիների ընթացքում կատարած աշխատանքի վերաբերյալ հաշվետվությամբ։ Աշխատանքներն իրականացվել են նախարարության և ենթակա կառույցների ջանքերով, ինչի համար շնորհակալություն եմ հայտնում մեր թիմին, հպարտ եմ Ձեզնով։Այո՛, մեր աշխատանքներն այս համատարած սենսացիոն և լայքաբեր տեղեկատվական հոսքերում տեղ չգտան և հնչեղություն չստացան, միգուցե շատ զբաղված էինք համակարգ կառուցելով քան աղմուկ հանելով»։ 

ԱԺ «Իմ քայլը» խմբակցության պատգամավորի մանդատը վայր դրած Էդգար Առաքելյանը գրել է․ «Սիրելի՛ իմքայլական ընկերներ, էս քար լռությունն ինչպե՞ս հասկանանք. ինչո՞ւ ոչ մեկդ չեք խոսում, ինչի՞ց եք քաշվում։ Էն արժեքները, որոնց ամբողջ կյանքում դավանել եք ու որոնք բացարձակ եք համարել, ինչո՞ւ եք զոհում հանուն ձեր ներկայիս կարգավիճակի ու թայֆայականության (կներեք, որ էս բառն եմ օգտագործում բայց սա արդեն թիմային համերաշխություն անվանել չի կարելի» ։