«Ժողովուրդ». Որքան Քոչարյանը հեռու է քաղաքականությունից, այնքան ավելի է սերտաճում ստվերային տնտեսության հետ

«Ռեգնում» լրատվական-վերլուծական կայքի խմբագիր Ռուբեն Գրձելյանը հանդես է եկել հրապարակմամբ` Ռոբերտ Քոչարյանին մեղադրելով տվերային տնտեսությունը ղեկավարելու մեջ: Ըստ նրա` որքան Քոչարյանը հեռու է քաղաքականությունից, այնքան ավելի է սերտաճում ստվերային տնտեսության հետ: Նա նաև նշել է, թե ի տարբերություն Սերժ Սարգսյանին մերձ օլիգարխների, որոնք հարկատուների ցուցակում վեր են բարձրանում, ԲՀԿ նախագահ Գագիկ Ծառուկյանին պատկանող բիզնեսները գնալով զիջում են իրենց դիրքերը:

Այս հրապարակմանը պատասխանել է Քոչարյանի գրասենյակի ղեկավար Վիկտոր Սողոմոնյանը: «Ընդհանուր առմամբ, կարող եմ միայն ափսոսանք հայտնել այն կապակցությամբ, որ «Ռեգնում»-ը ժամանակ առ ժամանակ սկսել է ծառայել որպես ցածրորակ քարոզչության ամբիոն: Ինչ վերաբերում է կոնկրետ հոդվածին, ապա այն ծիծաղելի է ոչ միայն բովանդակության անհեթեթության պատճառով»,- ասել է նա` ակնարկելով Գրձելյանի բարեկամական կապերի մասին,- «եթե դուք ծանոթ եք հոդվածի հեղինակին և գիտեք նրա որոշ բարեկամական կապերի մասին, ապա տնտեսության ստվերի, վարչական ռեսուրսի օգնությամբ երկիրը թալանելու և «կենտրոնական քաղաքական կլանների» մասին նրա դատողությունները, վստահ եմ, կստիպեն ձեզ ծիծաղել»:

Թերթը նշում է, որ «Ռեգնում»-ն այլևս չի ֆինանսավորվում ՌԴ-ից, գործում է որպես ինքնուրույն ուժ, և ըստ որոշ լուրերի` այն անցել է Սերժ Սարգսյանի փեսայի` Միքայել Սինասյանի ազդեցության տակ: