«Մանկական Եվրատեսիլ»-ի քվեարկությունն սկսված է

Ժամ առաջ Կարեն Դեմիրճյանի անվան մարզահամերգային համալիրի լեփ-լեցուն դահլիճում մեկնարկեց «Մանկական Եվրատեսիլ 2011»-ը:

Շքեղ լուսավորությամբ, ձայնային լուծումներով հագեցած բեմից միմյանց հաջորդելով բեմ բարձրացան «Մանկական Եվրատեսիլ»-ի` 13 երկիր ներկայացնող մասնակիցներն ու հաղորդավարները` Ավետ Բարսեղյանն ու Գոհար Գասպարյանը:

Մրցույթում առաջինն ելույթ ունենալու պատվին, ինչպես նախապես որոշվել էր քվեարկության արդյունքում, արժանացավ Ռուսաստանի Դաշնությունը ներկայացնող մասնակիցը` Կատյա Ռյաբանովան` իր Ռոմեո և Ջուլիետ կատարմամբ: 

Հիշեցնենք, որ Հայաստանի բնակիչները հնարավորություն չունեն քվեարկելու մեր երկիրը ներկայացնող մասնակցի օգտին: 

Բացի այդ, այս տարի փոխվել են նաև մրցույթի մասնակիցների օգտին քվեարկելու պայմանները: Եթե նախկինում մրցույթում քվեարկությունն սկսվում էր առաջին մասնակցի ելույթից անմիջապես հետո, ապա այս տարի քվեարկությունը կիրականացվի միայն մրցույթի վերջին 15 րոպեներին:

Անցած տարիներին յուրաքանչյուր երկիր քվեարկության ժամանակ ներկայացնում էր միայն ամենաբարձր միավորները, ցածր միավորներն էկրանին էին հայտնվում անմիջապես: Իսկ այս տարվանից սկսած` հայտարարվելու են բոլոր միավորները` 1-12: