«Հայկական ժամանակ». «Աչքը կուշտ» Սամվել Բալասանյանը չի բացառվում, որ քարոզարշավի ժամանակ ֆինանսական նեղություն կրի

Գյումրու քաղաքապետի թեկնածուներն իրենց ունեցած գույքի և եկամուտների մասին հայտարարագրերն արդեն ներկայացրել են թիվ 34 ԸԸՀ: Թերթը գրում է, որ իրենց փաստաթղթերում թեկնածուները բավականին համեստ թվային տվյալներ են ներկայացրել: Ամենազավեշտալին քաղաքապետի իշխանական թեկնածուի' Սամվել Բալասանյանի ընդհանուր կարողությունների մասին ներկայացված թվային տվյալներն են: Պարզվում է' Աժ նախկին փոխնախագահ, ներկայիս պատգամավոր, «աչքը կուշտ» բիզնեսմեն-գարեջրագործը չի բացառվում, որ այս ընտրությունների քարոզարշավի ժամանակ ֆինանսական նեղություն կրի: Բալասանյանի հայտարարագրում նշված է, որ նրա տարեկան եկամուտը, այսինքն' պատգամավորական աշխատավարձը կազմում 13 միլիոն 800 հազար դրամ, և ինքն ունի 8 միլիոն դրամ կանխիկ գումար: Հայտարարագրի հաջորդ էջում որպես եկամուտ նշված է նաև գումար 22 հազար դոլարի չափով: Նշված է նաև, որ իր անունով Գյումրիում շենք-շինություններ ունի, Ազատան գյուղում հողատարածք և անասնագոմ: Ունի մեկ ավտոտրանսպորտային միջոց' 1977թ. արտադրության սովետական «Մոսկվիչ» մակնիշի: Եվ այսքանը միայն, այլ միջոցներ քաղաքապետի թեկնածուն, ըստ հայտարարագրի, չունի:

Այս թեկնածուի մամլո խոսնակ Զոհրապ Եգանյանը «ՀԺ»-ի հետ զրույցում նշեց, որ հայտարարագրում նշված բոլոր տվյալները Բալասանյանի ունեցվածքի մասին' իրական են, նա այլ եկամուտ չունի: Հարցին, թե այդ դեպքում ում են պատկանում Բալասանյանի' քաղաքում գործող սպասարկման օբյեկտները, գարեջրի գործարանը, ռեստորաններն ու մյուս սեփականությունները, Եգանյանը պատասխանեց, որ համենայնդեպս իր անունով ունեցած սեփականությունները նշված են հայտարարագրում:

Հաշվի առնելով այն հանգամանքը, որ Բալասանյանը, իր խոսքով ասած, ծախսող մարդ է, գումարը երբեք չի ափսոսում և առհասարակ նախընտրական շրջանում էլ բավականին ակտիվ է, օրինակ' բարեգործություններ է անում, ալեհավաք, գարու և ցորենի սերմացու բաժանում, սիրում է ընտրողներին նվերներ տալ ու վճարովի եթերում էլ շատ երևալ, քաղաքապետի թեկնածուի մամլո խոսնակին հարց ուղղեցինք' հնարավո՞ր է Բալասանյանի ֆինանսները չբավարարեն, և քարոզարշավի վերջին օրերին, ասենք, նա լուրջ խնդրի առաջ կանգնի, Զոհրապ Եգանյանը պատասխանեց. «Դժվար թե նեղություն կրենք, նորմալ է' կհերիքի»: Մեզ շատ հետաքրքրեց նաև հայտարարագրում նշված այն մեքենայի մակնիշը, որն իրականում ունի Բալասանյանը, այն է' «Մոսկվիչ»: Եգանյանին հարցրինք, թե օրվա որ ժամերին ու ինչպիսի վայրեր այցելելիս է իր սեփական «Մոսկվիչով» երթևեկում Բալասանյանը, քանի որ սովորաբար նա, որպես Աժ գյուղատնտեսական և բնապահպանական հարցերի մշտական հանձնաժողովի նախագահ, երթևեկում է իր ծառայողական «Տոյոտա քեմրի»-ով: «Մոսկվիչը պարոն Բալասանյանի մեքենան է, դա որպես նմուշ, որպես հնություն է նա պահում, բայց հիմնականում իր ծառայողական ավտոմեքենայից է օգտվում»,- նշեց Բալասանյանի մամլո խոսնակը: Բայց գոնե գյումրեցուն հայտնի է, թե փողասեր Բալասանյանի իրական կարողություններն ինչքան են, և «հնություններ սիրող» քաղաքապետի թեկնածուն իրական կյանքում այնքան էլ համեստ չէ, որքան ընտրական հայտարարագրում: