«Առավոտ». Ավագանի կոչվածն ուղղակի թելադրված կույրաղիք է

Aravot.am-ը «Հանրապետություն» կուսակցության քաղաքական խորհրդի անդամ Սուրեն Աբրահամյանից հետաքրքրվեց, թե ինչպե՞ս կմեկնաբանի Երևանի ավագանու անդամ Ռուբեն Թորոսյանի երեկվա հայտարարությունը, թե ավագանու առաջիկա նիստում պատրաստվում է նախաձեռնություն ներկայացնել' դադարեցնելու «ՀԱԿ» կուսակցությունների դաշինքից ավագանու անդամներ ընտրված 8 անձի լիազորությունները, որոնց թվում նշված է նաև Սուրեն Աբրահամյանի անունը:

Պարոն Աբրահամյանը Ռուբեն Թորոսյանին խնդրեց դա միանգամից չանել. «Թող գոնե մտերիմների, ծանոթների միջոցով զգուշացնի, որ հանկարծ չվատանամ»:

ՀԱԿ անդամ Գուրգեն Եղիազարյանն էլ, որի անունը նույնպես Ռուբեն Թորոսյանի հրապարակած «սև» ցուցակում է, տեղյակ չէր պարոն Թորոսյանի նախաձեռնությունից: «Առավոտ»-ի հարցին, թե գուցե պատճառը հակական ավագանիների' ավագանու նիստերը բոյկոտե՞լն է, պարոն Եղիազարյանն ասաց. «Ողջունում եմ Ռուբեն Թորոսյանի իշխանամետ նախաձեռնությունը: Բայց կցանկանայի Ռուբենի հետ խոսել, տեսնելու մտքինն ի՞նչ է, ինչի՞ է նման բան արել, նոր ինչ-որ բան ասեի: Ռուբիկին առաջին տարին չէ, որ ճանաչում եմ: Բայց ասեմ, որ էդ ավագանի կոչվածն ուղղակի թելադրված կույրաղիք է, մեզ մոտ նման ինստիտուտ գոյություն չունի: Նայեք Երևան քաղաքին և պատկերացրեք, թե ո՛վ է ավագանին, ուրիշ ապացույցներ հարկավոր չեն, քաղաքն ամեն օր այլանդակվում է, այնպես չէ, որ գոնե մեկ շաբաթ դադար են տալիս: Քաղաքապետ կոչվածն ընդամենը մենեջեր է, որը կատարում է ավագանու կամքը, այսինքն' երևանցու կամքը: Հիմա տեսեք' էդ մենեջերն ինչո՞վ է զբաղվում, քաղաքացու կամքը ո՞ր հարթության վրա է գտնվում: Օրինակները բազում են' հիշո՞ւմ եք բուտիկների պատմությունը, ինչպես սկսվեց, ինչպես հանգուցալուծվեց: Որտեղից որտեղ, խրոխտ երևաց հանրապետության նախագահը և հրահանգ իջեցրեց' «Տարոն ջան, այսպես չի կարելի, այս հարցը պիտի այսպիսի լուծում ստանա»: Այդ «Տարոն ջանը», այդ հրահանգը, բա էդ ժամանակ էդ ավագանին ո՞ւր էր: Այդ ընթացքում տեսա՞ք ավագանու գործունեության նշույլ անգամ, իհարկե ոչ: Բա լավ ավագանու անդամներից մեկի խելքը չէր կտրո՞ւմ գոնե ձևի համար հարց բարձրացներ, այսինքն' ևս մեկ անգամ ապացուցվեց, որ նման ինստիտուտ գոյություն չունի: Կոնկրետ ես երբեք չեմ մասնակցի, երբեք չեմ գնա նրանց կողքին չեմ նստի, որովհետև անիմաստ եմ համարում: Ընդեղ կարելի է ժողգործիքներ տեղադրել, թող դմդմփացնեն, միևնույն է, ոչ մի բանով չեն զբաղվում»: