Հոկտեմբերի 27-ի գործը կվերաբացեն՝ երեք խնդիր լուծելու նպատակով

ԱԱԾ պետի նորանշանակ տեղակալ Արգիշտի Քյարամյանը ԱԱԾ է հրավիրել անկախ պատգամավոր Արման Բաբաջանյանին՝ վերջինիս հետ Հոկտեմբերի 27-ի գործով լուրջ զրույց ունենալու նպատակով: Հիշեցնենք, որ ամիսներ առաջ Բաբաջանյանը այցելել էր Նաիրի Հունանյանին, և թերևս դրանից հետո ԱԱԾ-ն ցանկանում է այդ հանդիպման մանրամասներին ծանոթանալ՝ սակայն, ինչո՞ւ հենց հիմա և ինչո՞ւ Բաբաջանյանից, և ոչ թե անմիջապես Հունանյանից: Ամիսներ առաջ իշխանությունները հայտարարեցին, որ եթե Հունանյանը ունի այնպիսի ասելիք, որը լույս կսփռի գործի պատվիրատուների վրա, ապա իշխանություններն էլ իրենց հերթին կարող են գնալ որոշակի գործարքի և այդ տեղեկության դիմաց Հունանյանին ազատություն կշնորհեն: Այն ժամանակ, սակայն, հանրային ռեզոնանսը բացասական էր և ժամանակավորապես Հոկտեմբերի 27-ի գործի վերաբացման մասին մոռացան:  Վերհիշեցին հիմա, երբ անհրաժեշտ է լուծել երեք խնդիր: Որո՞նք են դրանք: Նախ և առաջ երկրորդ նախագահ Ռոբերտ Քոչարյանի գործով սպասվում է ՄԻԵԴ-ի որոշումը և հասկանալի է, որ այն չի բխելու Փաշինյանի շահերից: Անհրաժեշտ է արագ Քոչարյանին բանտում պահելու Պլան Բ-ն մշակել, ինչն էլ կարող են իրագործել, եթե Հունանյանը տա անհրաժեշտ անունը: 

Երկրորդ ուշագրավ հանգամանքն այն է, որ գործի վերաբացման մասին սկսեցին խոսել ռուսական գազի հավանական թանկացման մասին խոսակցությունների ֆոնին և հասկանալի է, որ սա հստակ մեսիջ է ռուսական կողմին, հատկապես, որ Անդրանիկ Քոչարյանի պնդումները, որ Հոկտեմբերի 27-ի գործում երևում են օտար ուժերի շահեր՝ դեռ արդիական են: 

Եվ, իհարկե, երրորդ խնդիրը՝ սոցիալական լարվածության ֆոնին կեղծ օրակարգի ձևավորումը և հանրության ուշադրության շեղումը: Հասկանալի է, որ Հոկտեմբերի 27-ի գործը շարքային քրեական գործ չէ, այն ռեզոնանսային է և եթե վերաբացվի, դեպի այս գործն է սևեռվելու հանրային ուշադրությունը, ինչն էլ անհրաժեշտ է Փաշինյանին՝ գոնե ժամանակավորապես քննադատության թիրախից դուրս գալու և ժամանակ շահելու համար: Եթե ամիսներ առաջ հասկանալով, որ Հունանյանին ազատ արձակելը իր վրա կարող է թանկ նստել՝ Փաշինյանը չգնաց այդ քայլին, այսօր նա իր արսենալում չունի վերը նշված երեք խնդիրները լուծելու այլ տարբերակներ և գնալու է վա-բանկ…