«Առավոտ». Տավուշում 31-ամյա աղջիկն առաջադրվել է ՀՀԿ-ական հոր դեմ

Սեպտեմբերի 23-ին Տավուշի մարզի 54 համայնքներում կկայանան ՏԻՄ ընտրություններ: Իջևանի տարածաշրջանի Աճարկուտ համայնքի ղեկավարի թեկնածու են առաջադրված գործող գյուղապետ, ՀՀԿ անդամ Ռաֆիկ Օհանյանը և նրա դուստրը` նույնպես ՀՀԿ անդամ 31-ամյա Լիանա Օհանյանը: Ըստ «Առավոտ»-ի տեղեկությունների' վերջինս զբաղվում է գործարարությամբ, մարզի տարածաշրջաններում դասավանդում է տոնական սեղանների ձևավորման հմտություններ: Ռաֆիկ Օհանյանը 1991թ.-ից ղեկավարում է Աճարկուտ համայնքը, նա այժմ համայնքի ղեկավարի թեկնածու է առաջադրվել ՀՀԿ-ի առաջադրմամբ: «Աղջիկս առաջիկայում կհանի իր թեկնածությունը»,- ասաց Ռաֆիկ Օհանյանը:

Թերթը նշում է, որ գործող Ընտրական օրենսգրքով համայնքի ղեկավարի ընտրությունը կայացած է համարվում, եթե առաջադրվում է մեկից ավելի թեկնածու: Չի բացառվում, որ 185 բնակիչ ունեցող Աճարկուտում կառաջադրվի համայնքի ղեկավարի երրորդ թեկնածու: