«168 ժամ». Մաքսիմ Հակոբյանը` ՀՀԿ-ի տարածքային շտաբի պե՞տ

Նախօրեին Զանգեզուրի պղնձամոլիբդենային կոմբինատի տնօրեն Մաքսիմ Հակոբյանը հանդիպում է կազմակերպել Սյունիքի մարզպետարանում, որին մասնակցել են մի շարք դպրոցների տնօրեններ և պետական կառույցների ղեկավարներ: Հանդիպման ժամանակ Մ. Հակոբյանը հայտարարել է, որ Կապանի քաղաքապետի ընտրություններում պաշտպանելու է ՀՀԿ անդամ, «Հայփոստի» Կապանի մասնաճյուղի տնօրեն Աշոտ Հայրապետյանի թեկնածությունը: Վերջինս երեկ «168 ժամի» թղթակցի հետ զրույցում հաստատել է այս տեղեկությունը' ասելով, որ նման հանդիպում իսկապես եղել է, և Հակոբյանը հայտարարել է իրեն աջակցելու մասին:

Երեկ թերթի թղթակցի հետ հեռախոսազրույցում Կապանի գործող քաղաքապետ, ՀՅԴ անդամ Արտուր Աթայանն ասել է, թե իր համար անակնկալ էր Զանգեզուրի պղնձամոլիբդենային կոմբինատի տնօրեն Մաքսիմ Հակոբյանի այն հայտարարությունը, թե սեպտեմբերի 9-ին կայանալիք ՏԻՄ ընտրություններում ինքը պաշտպանելու է ՀՀԿ անդամ, «Հայփոստի» Կապանի մասնաճյուղի տնօրեն Աշոտ Հայրապետյանի թեկնածությունը: Թղթակցի հարցին, թե, այնուամենայնիվ, ինչպե՞ս եք վերաբերվում Մ. Հակոբյանի այդ քայլին, Ա. Աթայանը պատասխանել է. «Նորմալ, ի՞նչ պետք է ասեմ: Դա նրա որոշումն է, և հարգում եմ այդ որոշումը: Այդ հարցի վերաբերյալ որևէ մեկնաբանություն տալ չեմ կարող»: Իսկ մեր թղթպկցի այն դիտարկմանը, թե շաբաթներ առաջ «168 ժամ»-ին տված հարցազրույցում հայտարարել էիք, որ Մ. Հակոբյանն առաջիկա ՏԻՄ ընտրություններում չեզոք դիրքորոշում է պահպանելու, Ա. Աթայանը պատասխանել է. «Ճիշտն ասած, ես հույս ունեի, որ Մաքսիմ Հակոբյանը չեզոք կմնար ընտրություններին, քանի որ, իմ տեղեկություններով, նախագահական ընտրություններին նա պետք է լիներ ՀՀԿ-ի տարածքային շտաբի պետը: Իմ կարծիքով' այս պահին ճիշտն այն կլիներ, որ նա մնար չեզոք: Ինձ համար անակնկալ էր Մաքսիմ Հակոբյանի որոշումը»: Ա. Աթայանը նաև ասել է, թե իր և Մ. Հակոբյանի միջև որևէ տարաձայնություն չի եղել, իրենց հարաբերությունները շարունակում են կրել նորմալ բնույթ: Թերթը հիշեցնում է, որ նախորդ ՏԻՄ ընտրություններին Մ. Հակոբյանը պաշտպանել է Ա. Աթայանի թեկնածությունը: