«Հրապարակ». Քննչական մարմիններից կա հոսունություն. լավագույն կադրերը նախընտրում են հեռանալ

Մենք իրավացիորեն դժգոհում ենք, որ տարբեր աղմկոտ քրեական գործերի հիմնական մեղավորներին դուրս են բերում մեղադրյալների ցանկից և պատժում են միայն սլաքավարներին, սակայն քննչական մարմիններին մոտ կանգնած մեր աղբյուրները պատմում են, որ այդ բոլոր գործերի ընթացքը կառավարվում է բարձր իշխանությունների և մասամբ' դատախազության բարձրաստիճան պաշտոնյաների կողմից:

Քննիչներից մեծ ջանք է պահանջվում քննությունը նորմալ տանելու համար: Ամեն մի մանրուք թելադրվում է վերևից: Նույն «Հարսնաքարի», փուչիկների գործով կամ Մարտի 1-ի քաղբանտարկյալների գործերով քննչական խմբերը մեծ դժվարություններ են ունեցել և ստիպված են եղել անել բաներ, որոնց հետ կտրականապես համաձայն չեն եղել: Ասենք, «Հարսնաքարի» գործի նյութերին ծանոթանալու ժամկետն անգամ վճռվել է նախագահականում, և երբ աղմուկ է բարձրացել, ոչ ոք չի հիշել, որ նախաքննությամբ զբաղվող քննիչներից ոմանք զգուշացրել են, որ նախապես տրամադրված երկու օրը շատ կարճ ժամանակ է: Սակայն, երբ աղմուկը բարձրացավ, բնականաբար, սկսեցին մեղադրել ոչ թե իշխանություններին, այլ քննիչներին: Նաև սա է պատճառը, որ քննչական մարմիններից կա հոսունություն. լավագույն կադրերը նախընտրում են հեռանալ և աշխատել այլ կառույցներում, որտեղ առավել ազատ են' ասենք, բանկերում, փաստաբանական գրասենյակներում և այլն: