«Հայկական ժամանակ». Տիգրան Սարգսյանն է ուզում, որպեսզի մարդիկ գնան երկրից ու հեղափոխություն չանեն

Եթե հիշում եք, անցած տարվա ամռանը ՀՀ վարչապետ Տիգրան Սարգսյանը հայտարարեց, որ կառավարությանը նույնպես մտահոգում է «Համերկրացիներ» ծրագրով Հայաստանից Ռուսաստան մեկնելու գործընթացը: «Համերկրացիներ» ծրագիրը հնարավորություն է տալիս Հայաստանի քաղաքացիներին' ընտանիքներով մեկնել Ռուսաստան, ստանալ այդ երկրի քաղաքացիություն և մշտական աշխատանք: Իսկ Ռուսաստանն, այդպիսով, լուծում է իր համար ռազմավարական նշանակություն ունեցող խնդիր' բնակեցնում է հեռավոր ու սակավաբնակ տարածքները: «Մենք մեր ռուս գործընկերների ուշադրությունը հրավիրել ենք այս հանգամանքի վրա, որ Հայաստանի Հանրապետությունում այդ ծրագիրը այդ ստանդարտներով չի կարելի իրականացնել, և այս խնդիրը դառնալու է միջպետական մակարդակով քննարկումների առարկա, և մենք պետք է քաղաքական մակարդակում այս խնդիրը լուծենք»,- ասել էր վարչապետը' Օշականում մի խումբ մտավորականների հետ ունեցած հանդիպման ժամանակ: Այդ մտավորականներն, ի դեպ, ահազանգել էին երկրում ահագնացող արտագաղթի մասին' իշխանություններից պահանջելով կանխարգելիչ որոշակի միջոցառումներ ձեռնարկել: Ավելի ուշ, Գյումրիում ՌԴ հյուպատոս Վասիլի Կորչմարը պնդել էր, որ «Համերկրացիներ» ծրագիրը դադարել է ու այլևս չի շարունակվելու: Փաստերը, սակայն, այլ բան են վկայում' այս ծրագիրը շարունակում է գործել և´ Գյումրիում, և´ Երևանում: Ավելին, մեր երկրի ռազմավարական գործընկեր Ռուսաստանը ոչ միայն չի դադարեցրել այդ ծրագիրը, այլև գործի է դրել նորերը:
Մասնավորապես, ՀՀ-ում բացված գրասենյակներից մեկում ՌԴ ներկայացուցիչը այցելուներին բացատրում Է, որ մի շարք կատեգորիայի մարդիկ կարող են հեշտացված կարգով ՌԴ քաղաքացիություն ձեռք բերել, նրանց իրավաբանական խորհրդատվություն է առաջարկվում' խոստանալով հարկ եղած դեպքում նախապատրաստել անհրաժեշտ փաստաթղթերի փաթեթը: ՀՀ վարչապետ Տիգրան Աարգսյանն ասել էր, չէ՞, որ Հայաստանում այդ ծրագիրը այդ ստանդարտներով չի կարելի իրականացնել: Եվ ահա այժմ հենց դա էլ տեղի է ունեցել' ստանդարտները փոխվել են, ու դեպի ՌԴ արտագաղթ կազմակերպելու մեխանիզմները ավելի են բազմազանացվել ու պարզեցվել: Ակնկալել, որ մի օր էլ հանկարծ Հայաստանն այլևս թույլ չի տալու ՌԴ-ին' տանել իր քաղաքացիներին, մեծ միամտություն կլիներ: Նախ որ ինքը' Տիգրան Սարգսյանն է ուզում, որպեսզի մարդիկ գնան երկրից ու հեղափոխություն չանեն, հետո էլ պատկերացնո՞ւմ եք այսպիսի իրավիճակ՝ Պուտինը Հայաստանում որևէ ծրագիր իրականացնելու մտադրություն է հայտնում, և մեր երկրի գործող իշխանություններն ասում են' չէ: