«Առավոտ». Հրանտ Բագրատյանը համաձայն է բանավիճել Վարդան Արամյանի հետ

Ֆինանսների փոխնախարար Վարդան Արամյանը Ֆեյսբուքյսսն իր էջում բանավեճի էր հրավիրել ԲՀԿ պատգամավոր Վարդան Օսկանյանին' տնտեսական քաղաքականության շուրջ: Այդ գրառումն արվել էր այն բանից հետո, երբ Վարդան Օսկանյանը կոշտ քննադատության էր ենթարկել վարվող տնտեսական քաղաքականությունը:

Երեկ «Առավոտը» Վարդան Արամյանից հետաքրքրվեց, թե այդ հրավերն ուժի մե՞ջ է, և կարո՞ղ է բանավիճել տնտեսության խնդիրների շուրջ, և մասնավորապես ո՞ւմ հետ կցանկանա և կկարողանա բանավիճել: Նա պատասխանեց, որ հրավերը միանշանակ ուժի մեջ է, և կբանավիճի ցանկացած քաղաքական գործչի հետ' Վարդան Օսկանյանի, Հրանտ Բագրատյանի. «Բայց միայն մի պայմանով' քաղաքական պոպուլիզմին չենք տրվում, զուտ մասնագիտական քննարկում' խնդրեմ, զուտ ցուցանիշների հիման վրա: Եթե, օրինակ, Հրանտ Բագրատյանը կամ Օսկանյանը զերծ կմնան պոպուլիստական քննարկումներից, ասենք' այդ նույն բառերով, բարձրագոչ բաներով մենակ մաքուր մասնագիտական դնենք, խոսենք իրար հետ: Տեսնենք այդ որտե՞ղ է, որ ասում են՝ տնտեսական բարելավում չկա: Այդ ո՞նց չկա»:

«Առավոտ»-ի հետ զրույցում իրեն դեբատի հրավիրելու հետ կապված ՀԱԿ պատգամավոր Հրանտ Բագրատյանը Արամյանին այսպես պատասխանեց. «Ինչպես հայտնի է, սույն թվականի մարտ-ապրիլին ես Սերժ Սարգսյանին (ՀՀԿ համագումարում նրա ունեցած «տնտեսագիտական» ելույթի մասով) և Տիգրան Սարգսյանին (ՀՀԿ նախընտրական ծրագրի մասով) հրավիրեցի բանավեճի: Այդպիսին էր նաև գրեթե առանց բացառության բոլոր լրատվամիջոցների պահանջը: Բավական է ասել, որ եթե իրար ենք գումարում Ս. Սարգսյանին ուղղված իմ աոաջին նամակը ընթերցած քաղաքացիների թվաքանակը ըստ կայքերի' կազմում է 120 հզ. մարդ: Արդ, հանուն այդ 120 հզ-ի, ես իբրև նախկին վարչապետ, ընդդիմության առաջատար գործիչներից մեկը, բանավեճի հրավիրեցի նրանց' պահպանելով ռանգի ու պատշաճության բոլոր կանոնները: Սույն պարոնը' Արամյանը, հիանալի իմանալով խնդրի էությունը, իր ղեկավարների ճնշման տակ իրեն աոաջ է գցում, թե շեֆերիս մի կպի, արի ինձ հետ բանավիճի: Իրականում մենք գործ ունենք Տիգրան Սարգսյանի հետ, որը հիմա էլ հանդես է գալիս Վարդան Արամյանի անվան տակ:

Այդուհանդերձ, Արամյան, Ձեզ պետք է ուրախացնեմ: Ես համաձայն եմ: Բնականաբար, մեր «բանավեճը» կկայանա այն բանից հետո, երբ Սերժ կամ Տիգրան Սարգսյանը հայտարարություն կանեն, որ դուք իրենց եք ներկայացնում: Կկայանա անկախ այն բանից, որ դուք ձեր հարցադրման մեջ, ըստ «Առավոտի» հետ հարցազրույցի, ինձ նաև պիտակավորել եք' «քաղաքական պոպուլիստ»: Եվ սա այն դեպքում, երբ այսօր (օգոստոսի 22-ին) լրագրողների մոտ ձեր (ավելի ճիշտ Տիգրան Սարգսյանի) կատարած «վերլուծությունները» ոչ ավելին, քան կատարյալ ախմախություն դժվար է բնութագրել: Ինչևէ, կամ թուղթ բերեք, որ իրենց եք ներկայացնում (այնժամ «կբանավիճենք») կամ էլ վարչապետից իրավունք ստացեք գալ Աժ չորեքշաբթի օրերը և բանավիճել»: