«ՀԺ». Նախագահական ընտրություններում ԲՀԿ-ի օրակարգից Վարդան Օսկանյանի առաջադրման հարցը դուրս է եկել

Նախագահական ընտրություններում «Բարգավաճ Հայաստան» կուսակցության օրակարգից նախկին ԱԳ նախարար Վարդան Օսկանյանի առաջադրման հարցը դուրս է եկել:
Այս մասին հայտնում են «ՀԺ»-ի իշխանական աղբյուրները: Վարդան Օսկանյանը երեկ չի ցանկացել պատասխանել թերթի հարցերին և խնդրել է զրույցը թողնել մի ուրիշ օրվա: Օսկանյանի և ԲՀԿ-ի նախագահի թեկնածուի վերաբերյալ թերթի հարցերին երեկ պատասխանել է Աժ ԲՀԿ խմբակցության քարտուղար Նաիրա Զոհրաբյանը: Հարցազրույցը ներկայացնում ենք ստորև.
-Տիկին Զոհրաբյան, մեր տեղեկություններով, Վարդան Օսկանյանին նախագահի թեկնածու առաջադրելու հարցը ԲՀԿ-ի օրակարգից դուրս է եկել, հիմա ո՞վ է լինելու ԲՀԿ-ի նախագահի թեկնածուն:
-Առաջիկա նախագահական ընտրությունների վերաբերյալ «Բարգավաճ Հայաստանը» երբ կունենա իր որոշումը, այդ ժամանակ էլ, վստահ եղեք, որ անպայմանորեն կհայտնի:
-Օսկանյանի դեպքում ինչո՞ւ այդպես որոշվեց, ու պատահակա՞ն է, որ Ազգային անվտանգության ծառայությունը կարծես սառեցրել է փողերի լվացման գործը:
-Բոլոր փորձերը' ստանալ ավելին, քան ասել է Գագիկ Ծառուկյանը առաջիկա նախագահական ընտրությունների վերաբերյալ, բոլոր ինտերպրետացիաներով, տարբեր վարիացիաներով, արժանանալու են նույն պատասխանին' երբ որ «Բարգավաճ Հայաստանը» հարմար գտնի խոսել առաջիկա նախագահական ընտրությունների մասին, այդ ժամանակ էլ կասի: Որևէ մեկի որևէ փորձ' կորզել ավելին' տարբեր ենթատեքստերով, տարբեր անհեթեթ վարկածներ դնելով շրջանառության մեջ, տարբեր անլուրջ հոդվածներ դնելով շրջանառության մեջ, արժանանալու են նույն պատասխանին' երբ «Բարգավաճ Հայաստանը» հարմար գտնի, այդ ժամանակ էլ կխոսի: Ավելին Բարգավաճի որևէ ներկայացուցչից որևէ մեկը' նույնիսկ ամենահամառը, չի կորզել և չի կարողանալու կորզել ավելին:

-Անհեթեթ վարկած ասելով՝ Կարեն Կարապետյանի վարկա՞ծը նկատի ունեք։

-Նկատի ունեմ վերջին շրջանում շրջանառվող բոլոր տարբեր վարկածները, այդ թվում նաև բոլոր հնարավոր առաջիկա անհեթեթագույն վարկածները։ Նախագահական ընտրությունների վերաբերյալ ավելին չենք ասելու։

- Դուք բացառո՞ւմ եք, որ կարող է Գագիկ Ծառուկյանն անձամբ առաջադրվի, թե՞ հնարավոր եք համարում:

-Այդ մասով ես իհարկե ունեմ իմ անձնական դիրքորոշումը, բայց պիտի կրկնեմ այն, ինչ ասել է Ծառուկյհանը՝ այդ մասին՝ հաջորդ դասին: