Microsoft–ը փոխելու է վերջին 25 տարիների ընթացքում օգտագործված տարբերանշանը

Աշխարհում ծրագրային ապահովման ամենախոշոր ընկերությունը՝ Microsoft–ը, հայտարարել է իր տարբերանշանի փոփոխության մասին, որը, ի դեպ, օգտագործվում է 1987 թվականից։ Այս մասին հայտնում է Ռիա Նովոստին։

Նոր տարբերանշանը պատրաստվել է ընկերության կողմից մշակված բջջային սարքավորումների և անձնական համակարգիչների համար նախատեսված օպերցիոն համակարգերի ինտերֆեյսում կիրառված ոճին համապատասխան։ Այն Windows 8–ի պատրաստման ընթացքում ստացել է Metro անվանումը, սակայն բոլորովին վերջերս ընկերությունը հրաժարվել է տվյալ տերմինի կիրառումից։

Առաջին անգամ ընկերության տարբերանշանում, դրա անվանումից բացի, կան լրացուցիչ տարրեր՝ 4 քառակուսիներ՝ կարմիր, կանաչ, երկնագույն և դեղին, որոնք կազմում են մեկ մեծ քառակուսի։

Նշենք նաև, որ Microsoft–ի գոյության առաջին տարիներին ընկերության տարբերանշանը բավականին հաճախակի է ենթարկվել փոփոխությունների՝ 1975-1987 թթ. 4 անգամ, գրում է The Seattle Times։ Դրանցից վերջինը ընկերությունն օգտագործել է 25 տարիների ընթացքում։