Ղըրղզստանի նախագահը ցրել է կառավարությունը

Օգոստոսի 24–ին Ղըրղզստանի նախագահ Ալմազ Աթաբաևը կառավարության հրաժարականի մասին հրամանագիր է ստորագրել, հաղորդում է K-News-ը։ Այս որոշումը կապված է խորհրդարանական կոալիցիայի պառակտման հետ: Հրամանագրում մասնավորապես նշվում է, որ մինչ նոր վարչակազմի ընտրությունը, Կառավարությունը Օմուրբեկ Բաբանովի ղեկավարությամբ կշարունակի իրականացնել իր պարտականությունները:

Հիշեցնենք, որ 2011–ին Ղըրղզստանում ստեղծված կոալիցիայի մեջ մտնում էին խորհրդարանական հինգ խմբակցություններից չորսը, որոնց թվում էին «Աթա-Մեկեն» , «Ար-Նամիս», «Հանրապետություն» և «Սոցիալ – դեմոկրատական» (ՂՍԴԿ) կուսակցության խմբակցությունները։

Նշենք, որ Կոալիցիայի պառակտման մասին հայտարարվել էր դեռ օգոստոսի 22–ին: Միավորման շարքերից դուրս եկան նախկին խոսնակ Օմուրբեկ Տեկեբաևի գլխավորած «Աթա-Մեկեն»-ը և նախկին վարչապետ Ֆելիքս Կուլովի «Ար-Նամիս» -ը:

Այս որոշումը նրանք պատճառաբանել են ներկայիս վարչապետի՝ իրենց հետ անհամաձայնեցված գործողությամբ։ Նախկինում այս կուսկացությունները փորձում էին հայտնել անվստահության քվե վարչապետին, սակայն՝ ապարդյուն: Չնայած ՂՍԴԿ – ն կոալիցիան լքելու պաշտոնական որոշում չի կայացրել, այնուամենայնիվ միավորումը պառակտվեց:

Մոտ ժամանակներս Ղըրղզստանի նախագահը պետք է կարգադրի խորհրդարանական խմբակցություններից մեկին ստեղծել նոր վարչակազմ: Տեղական մամուլի կանխատեսմամբ՝ համապատասխան մանդատ կստանա ՂՍԴԿ–ն (նախագահը կուսակցության հիմնադիրն է):

Հիշեցնենք, որ վերջին շրջանում կոալիցիայի անդամների միջև ծագած հակամարտությունը ուղեկցվում էր փոխադարձ մեղադրանքներով: Այսպես, «Աթա-Մեկեն» -ը «Հանրապետություն» կուսակցության առաջնորդ, վարչապետ Բաբանովին մեղադրում է թուրք գործարարից կաշառք վերցնելու մեջ: Ի պատասխան այդ մեղադրանքի՝ «Հանրապետությունը» տարածել է ավազակային խմբավորումների այն հայտարարոորությունը, որի համաձայն, հեղափոխության ժամանակ նրանք գործել են «Աթա-Մեկենի» կարգադրությամբ: