Փաշինյանի օրոք Հայաստանի գրանցած միակ «աննախադեպ» ցուցանիշը

Հունիսի 10-ի պարետատան նիստից հետո ճեպազրույցի ժամանակ վարչապետ Նիկոլ Փաշինյանը, ի պատասխան կորոնավիրուսի դեմ պայքարը ձախողելու և պաշտոնյաներին պատասխանատվության ենթարկելու անհրաժեշտության վերաբերյալ Հայ հեղափոխական դաշնակցության դիտարկման մասին Yerkir.am-ի հարցին, հայտարարեց․ «Այսօր կորոնավիրուսի դեմ պայքարում Հայաստանի Հանրապետությունն անգամներով ավելի լավ ցուցանիշներ ունի, քան աշխարհի ամենազարգացած երկրները՝ մահացության ցուցանիշը, մեկ միլիոն բնակչությանն ընկնող մահացության և բազմաթիվ այլ ցուցանիշներ։ Եվ ես ինչ-որ չեմ տեսնում, որ աշխարհի այդ զարգացած երկրներում քաղաքական բացիլը տարածվի այնպես, ինչպես ՀՀ-ում…»։ 

Այսպես, ըստ Worldometers.info կայքի տվյալների՝ մեկ միլիոն բնակչի հաշվով դեպքերի ընդհանուր թվով 215 երկրների թվում հունիսի 10-ի դրությամբ Հայաստանը 20-րդն էր՝ 4760 դեպքով։ Իսկ Հայաստանից «անգամներով», այն էլ՝ միայն 1․3 անգամ, ավելի վատ վիճակում է միայն Միացյալ Նահանգները՝ 6245 դեպք մեկ միլիոն բնակչի հաշվով։ Հակահամաճարակային միջոցառումներ չիրականացրած Շվեդիան այս ցուցանիշով Հայաստանին գերազանցում է միայն 3 դեպքով։ Մեծ Բրիտանիայում դեպքերի թիվը շուրջ 500-ով պակաս է Հայաստանից, իսկ Գերմանիայի ցուցանիշներն այս կետով Հայաստանին զիջում են շուրջ երկու անգամ։ 

Արդեն այսօր կարող ենք փաստել, որ Հայաստանը 1 միլիոն բնակչի հաշվով կորոնավիրուսի վարակի ցուցանիշով առաջին տեղն է զբաղեցնում տարածաշրջանում: Worldometers.info պորտալի տվյալների համաձայն, հունիսի 17-ի դրությամբ այդ ցուցանիշը հասել է 6086-ի, Վրաստանում՝ 223-ի, Ադրբեջանում՝ 1084-ի, Թուրքիայում՝ 216-ի, Իրանում՝ 2323-ի, իսկ Ռուսաստանում՝ 3791-ի։1 միլիոն մարդու հաշվով կորոնավիրուսից մահացության ցուցանիշով Հայաստանը երկրորդ տեղում է՝ 102 դեպքով, առաջին տեղում Իրանն է (109), այնուհետեւ Թուրքիան (58), Ռուսաստանը (51), Ադրբեջանը (13), Վրաստանը (4): 

Հեղափոխությունից հետո սա Նիկոլ Փաշինյանի և իր թիմի օրոք Հայաստանի գրանցած թերևս ամենաաննախադեպ ցուցանիշն է...