«Հրապարակ». ՀՀԿ-ն Կապանի առաջին քաղաքապետին ստիպել է, որ կոչ անի բոլորին ընտրել Աշոտ Հայրապետյանին

Սեպտեմբերի 9-ին Կապանի քաղաքապետի ընտրություններում առաջադրված երրորդ թեկնածուն' անկուսակցական, Կապանի առաջին քաղաքապետ Գագիկ Աթաջանյանը, երեկ ինքնաբացարկի դիմում է ներկայացրել ընտրատարածքային ընտրական հանձնաժողովին' մրցապայքարում թողնելով գործող քաղաքապետ, դաշնակցական Արթուր Աթայանին և «Հայփոստի» Կապանի մասնաճյուղի տնօրեն Աշոտ Հայրապետյանին:

Հայտնի է, որ Աթաջանյանը Կապանում բավականին հեղինակություն ունի, և նրա խոսքը կշիռ ունի, ինչից Հանրապետականը փորձում է օգտվել: «Հրապարակին» հասած տեղեկություններով, ՀՀԿ-ն Աթաջանյանին ստիպել է, որ կոչ անի բոլորին ընտրել Աշոտ Հայրապետյանին: Սակայն Աթաջանյանը հրաժարվել է հանձնարարությունը կատարել' ասելով, որ եթե ելույթ ունենա, կարող է ժողովրդին միայն խորհուրդ տալ ճիշտ ընտրություն կատարել: Աթաջանյանը, սակայն, թերթի հետ զրույցում հերքել է տեղեկությունը. «Ինձ այդպիսի բան չեն ասել, սուտ բաներ են: Ես ժողովրդին ոչինչ չեմ ասի, ով ում ուզում է, թող ընտրի: Ոչ մեկ ինձ տենց բան չի ասել ու չի էլ կարա ասի»: Իսկ ինչո՞վ է պայմանավորված ինքնաբացարկի որոշումը: «Առողջական խնդիրներ ունեմ, վիճակս կտրուկ վատացավ: Ոտքս է ցավում, չեմ կարողանում քայլել, ջերմությունս է բարձրացել» -պատճառաբանել է Աթաջանյանը: Բայց ընտրություններին դեռ ժամանակ կա, գուցե ապաքինվեիք' հետաքրքրվել է թերթը: «Չէ, առողջական լուրջ խնդիրներ ունեմ, արդեն ուղարկել են Երևան: Չեմ կարող ընտրարշավներին մասնակցել: Ինքնաբացարկի պատճառը միայն առողջական խնդիրներս են: Ժողովրդի մի մասն էլ չի հավատում, բայց էդ ա պատճառը»: