«Առավոտ». Կյանքը Կոճոռ թաղամասում վտանգավոր է ու տխուր

Մինչ Աշոցքի տարածաշրջանի բոլոր գյուղերը զբաղված են ՏԻՄ ընտրություններով, Կոճոռ թաղամասի բնակիչներն իրենց տներում բազմացած գորտերի, անհայտ ցեղատեսակի ձկների, ճանճերի ու գարշահոտության դեմ պաքար են մղում: Ռուսական «Տյումենստրոյի» շինարարների համար կառուցված փայտյա այս թաղամասը Աշոցքի' երկրաշարժից տուժած 120 բնակիչներին 21 տարի առաջ հատկացրել են ժամանակավոր բնակվելու համար, սակայն 2006-ին փտած բնակարանները «փաթաթել են» անօթևանների վզին' շանտաժով հարկադրել են սեփականաշնորհել դրանք, ու այսպիսով համարել են անօթևանների հարցը լուծված:

Այժմ' կոճոռցիները անելանելի վիճակում են. փայտե շենքերը հերթով քայքայվում են. պատերն անջատվում են, հատակը քայլելիս փլվում է: Նրանք արդեն չեն հիշում, թե որերոդ անգամն է երկրորդ հարկի բնակիչը ծանր վնասվածքներով հայտնվել աոաջին հարկի հարևանի բնակարանում, իսկ առաջին հարկեցին' գորտերով ու մկներով լի խոնավ նկուղում: Ի դեպ, այստեղ հաճախակի է հրդեհ բռնկվում, գազամատակարարումից զուրկ տները 8-9 ամիս շարունակ աթարով են ջեռուցում, նույնիսկ ամռանը վառարանները չեն հանում' ճաշ եփելու համար անգամ աթար են վառում: Նրանք կառավարությանը անընդմեջ նամակներ են գրում, սակայն այդպես էլ արձագանք չեն ստանում: Կյանքը Կոճոռում այնքան վտանգավոր է ու տխուր, որ նրանք կատակում են, թե Ստեփան Զորյանը իր «Տխուր մարդիկ» պատմվածքում հենց իրենց էր նկարագրում: