«Հրապարակ».Ցավոք, մեր հասարակության գոնե 30 տոկոսը ողջունում է ծառուկյանական վարքագիծը

Սկզբում «Էպիկենտրոնն» էր ամեն օր ցույց տալիս «Բումբումիկի» արկածները և հեռարձակում անվճար զվարճություններով զմայլված մայրիկների տհաճություն պատճառող երախտագիտության խոսքն' ուղղված մեծն բարերար Ծառուկյանին, հետո այս «մարաթոնին» միացավ «Հայլուրն» ու սկսեց ցուցադրել, թե Հանրապետական կուսակցությունն ինչպես է հոգ տանում մատաղ սերնդի համար և ինչպես է կապկում Գագիկ Ծառուկյանի ծրագրերը:

Որակի առումով տարբերությունը քիչ է, թեև «Կենտրոնի» ռաբիզությանը Հ1-ը չի հասնի, բայց բովանդակությունը մեծ հաշվով նույնն է: Սրանք ոչ միայն տարրական բարեկրթություն ու համեստություն չունեն, փաստորեն, Կտակարան էլ չեն կարդացել. «Երբ դու ողորմություն անես, թող քո ձախ ձեռքը չիմանա, թե ինչ է անում աջ ձեռքդ»: Ասել կուզի' բարեգործությունդ մարդկանց երեսով մի տուր, մի նվաստացրու նրանց, մի ստիպիր, որ հրապարակավ շնորհակալություն հայտնեն: Մանավանդ' արածդ մեծ բան չէ: Բայց մերօրյա կուսակցական գործիչ-բարերար-բիզնեսմենների մարտավարությունն այլ է' նրանց հաջողության գաղտնիքը մի կոպեկի օգնությունը հարյուրի տեղ անցկացնելու և այդ տեսարաններն ամեն օր, օրը 24 ժամ պտտեցնելու մեջ է: Երբ խեղճ, չքավոր, կարիքից ու հոգսերից կքած մարդկանց գիտակցության մեջ մեխվում է բարերարի կերպարը, և նրա փոքրիկ ձեռնարկներն այնպես են ուռճացվում, որ թվում է' եթե նա չլիներ, երկիրը կկործանվեր, իսկ խեղճերին ու տկարներին ոչ մի օգնող չէր լինի:

Եթե հասարակությունը փոքր-ինչ առողջ լիներ ու արժանապատիվ, ապա պետք է մերժեր այս օգնությունն ու նման միջոցառումները թմբկահարողներին վռնդեր քաղաքական ասպարեզից: Ցավոք, մեր հասարակության գոնե 30 տոկոսը ողջունում է ծառուկյանական վարքագիծը և դրա մեջ ոչ մի վատ բան չի տեսնում: