Նիկոլ Փաշինյանի՝ Մոսկվա մեկնելը չեղարկվեց. վարչապետը նամակ է հղել Վլադիմիր Պուտինին

ԼՈՒՐԵՐ.com-ն արդեն տեղեկացրել էր, որ Նիկոլ Փաշինյանի մեկնումը Մոսկվա դեռևս «օդում առկախված է», քանի որ Մոսկվան դեմ է ԲՀԿ առաջնորդ Գագիկ Ծառուկյանի դեմ իրականացվող քաղաքական և իրավական այս պրոցեսներին՝ ամեն կերպ փորձելով որոշակի վերաբերմունք ցուցաբերել: 

Մենք գրել էինք նաև, որ Հայաստանի դիվանագիտական համակարգում իրար խառնված փորձում են կայունացնել հարաբերությունները և զերծ մնալ հրավերի չեղարկման խայտառակությունից և ամեն ինչ անել, որպեսզի Փաշինյանը մասնակցի զորահանդեսին:

Քիչ առաջ Վարչապետի աշխատակազմից պաշտոնապես հրապարակեցին Վարչապետ Նիկոլ Փաշինյանի նամակը Ռուսաստանի Դաշնության նախագահ Վլադիմիր Պուտինին, որը ներկայացնում ենք ստորև.

«Ափսոսանքով պետք է հայտնեմ Ձեզ, որ չեմ կարողանալու մասնակցել Հայրենական Մեծ պատերազմի 75-րդ տարեդարձին նվիրված միջոցառումներին: Ինչպես գիտեք, ես մեծ սիրով ընդունել էի հանդիսավոր արարողություններին մասնակցելու Ձեր հրավերը: Սակայն, ինչպես հետագայում պարզվեց, գոյություն ունեցող համաճարակային իրավիճակը թույլ չի տալիս ինձ իրականացնել այդ ուղևորությունը: Ելնելով դրանից՝ ես որոշեցի ձեռնպահ մնալ Մոսկվա կատարելիք իմ այցից, ինչը, ինչպես տեղյակ եք, մանրամասն քննարկվել և համաձայնեցվել է մեր աշխատակազմերի միջև:

Ինձ համար մեծ պատիվ կլիներ ներկա գտնվել հոբելյանական շքերթին: Վստահ եմ՝ մեր երկրների միլիոնավոր քաղաքացիներ հետևելու են այդ հանդիսավոր միջոցառմանը՝ մտովի գնալով հեռավոր 1945 թվականը, երբ մեր պապերը հպարտ քայլով անցնում էին Կարմիր Հրապարակով: Հաղթանակը Հայրենական Մեծ պատերազմում մեր ընդհանուր ժառանգությունն է: Հիշողությունն այդ մասին միավորում է մեր ժողովուրդներին և անսասան հիմք ստեղծում ապագա սերունդների բարեկամության համար:

Ակնկալում եմ մեր մոտալուտ հանդիպումը, որը հնարավորություն կտա քննարկելու մեր երկրների միջև դաշնակցային հարաբերությունների օրակարգի հարցերը:

Ընդունեք, պարոն նախագահ, քաջառողջության և Ձեր գործունեության մեջ հաջողությունների իմ լավագույն մաղթանքները»: