Բացվեցին «Դովլաթովի օրերը Տալլինում»

Էստոնիայի մայրաքաղաք Տալլինում երեկ բացվել են «Դովլաթովի օրերը Տալլինում»՝ նպատակաուղղված ռուս-էստոնական մշակութային երկխոսության ամրապնդմանը։

«Այս նախագիծը ստեղծվել է 2011 թվականին և նվիրված է հանճարեղ գրողի 70-ամյա հոբելյանին։ Այս տարի որոշեցինք անցկացնել մշակութային փառատոն, որն ուղղված է ամրապնդելու ռուսական և էստոնական մտավորականության և ազգային մշակույթների կապը», - նշել է փառատոնի կազմակերպիչ Օլիվեր Լոոդեն։

Այս տարի փառատոնը նվիրված է անվանի արձակագիր և լրագրող Սերգեյ Դովլաթովի, նրա ընկերների ու ժամանակակիցների, այդ թվում նաև նոր ժամանակների ռուս և էստոնացի հեղինակների, բեմադրիչների, արձակագիրների ստեղծագործական կյանքին։

Փառատոնի շրջանակներում իր ֆիլմը հանդիսատեսի դատին կհանձնի Մոսկվայից ժամանած բեմադրիչ Ռոման Լիբերովը։ էստոնուհի բեմադրիչ Տատյանա Կոսմինինան կներկայացնի պոետ Յուհան Վիիյդինգի ստեղծագործությունների հիման վրա ստեղծած ներկայացումը։

Ինչպես հայտնում է Լոոդեն, պատահական չէր, որ կազմակերպիչները որոշեցին ծանոթացնել ռուս հանդիսատեսին էստոնական գրականության հետ։
«Հետաքրքրությունը անշուշտ կա, սակայն ժամանակակից ռուսախոս հասարակությունը քիչ հնարավորություն ունի ծանոթանալու էստոնացի հեղինակների ստեղծագործությունների հետ», - նշեց Լոոդեն։

Փառատոնի ընթացքում կկայանա ստեղծագործական հանդիպում Դովլաթովի ընկերոջ՝ Սանկտ Պետերբուրգից ժամանած արձակագիր Անդրեյ Արյեվի հետ։

Հիշեցնենք, որ Սերգեյ Դովլաթովը հայազգի արձակագիր է և լրագրող։ Ծնվել է 1941 թ.-ի սեպտեմբերի 3-ին Ուֆայում։ 1972–ի սեպտեմբերից մինչև 1975 թ.-ի մարտը ապրել է Էստոնիայում։ Իր պատմավածքները, որոնք տեղ են գտել «Կոմպրոմիս» գրքում, նվիրել է «Խորհրդային Էստոնիա» պարբերականի մեկնաբաններին։ Ստեղծել է բազմաթիվ վիպակներ, պատմվածքներ և մեմուարներ, այդ թվում՝ նաև «Արգելանոց», «Զոնա», «Օտարերկրուհի», «Մերոնք» և «Պայուսակ»։