«Հաշմանդամները մեր հասարակության լիիրավ անդամներն են, և մենք պետք է հավասարության սկզբունքով ապրենք յուրաքանչյուր օր». Մարթա Սիմոնյան

Դեկտեմբերի 4-ին «Արամ Խաչատրյան» համերգասրահում Հայաստանի հանրապետական կուսակցության երիտասարդական կազմակերպությունը և հաշմանդամ երեխաների ծնողների «Վահան» բարեգործական ՀԿ-ն կազմակերպել էին բարեգործական համերգ՝ էստրադային երգիչների մասնակցությամբ։

Մշակութային այս ծրագիրը նվիրված էր Հաշմանդամների միջազգային օրվան։ Համերգին ներկա էին տարբեր հասարակական կազմակերպությունների հաշմանդամություն ունեցող երեխաներ։
Համերգային ծրագրում իրենց կատարումներով հանդես եկան Արսեն Գրիգորյանը (Մրո), Լեյլա Սարիբեկյանը, Վարդան Բադալյանը, Արթուր Հակոբյանը (Միստր Իքս), Վլադիմիր Արզումանյանը, Էմմին, Աննա Խաչատրյանը, Սոֆի Մխեյանը, Հասմիկ Կարապետյանը և այլ երգիչ-երգչուհիներ, ովքեր մեծ սիրով համաձայնել էին բարեգործական հիմունքներով ելույթ ունենալ և փոքրիկ տոն ստեղծել հաշմանդամ երեխաների համար։ Երգիչ-երգչուհիներն ընտրվել էին՝ հաշվի առնելով «Վահան» բարեգործական հասարակական կազմակերպության հաշմանդամ երեխաների ցանկությունը։
ՀՀԿ երիտասարդական կազմակերպության խորհրդի անդամ Մարթա Սիմոնյանը տեղեկացրեց, որ «Վահան» բարեգործական հասարակական կազմակերպության հետ համագործակցությունն արդեն չորս տարվա պատմություն ունի, և այս տարիների ընթացքում իրականացվել են բազմաթիվ համատեղ ծրագրեր։ «Հաշմանդամները մեր հասարակության լիիրավ անդամներն են, և մենք պետք է հավասարության սկզբունքով ապրենք յուրաքանչյուր օր։ Հաշմանդամների հիմնախնդիրները մշտապես կարևորվում են ՀՀԿ երիտասարդական կազմակերպության կողմից. տարվա ընթացքում իրականացվում են սոցիալական, մշակութային և տարաբնույթ այլ ծրագրեր, որոնք նպաստում են հասարակությանը նրանց ինտեգրմանը», - նշեց Մարթա Սիմոնյանը։
«Վահան» բարեգործական հասարակական կազմակերպության նախագահ Ռիտա Մնացականյանի հավաստմամբ՝ հաշմանդամ երեխաներն այսօր ունեն մշակութային միջոցառումների մասնակցելու մեծ ցանկություն, որովհետև նրանցից շատերը տանից դուրս գալու հնարավորություն անգամ չունեն։ Բացի այդ, մշակութային շատ օջախներ հարմարեցված չեն հաշմանդամություն ունեցող մարդկանց տեղաշարժման համար։ Ռիտա Մնացականյանը տեղեկացրեց նաև, որ համերգը հրավիրվել է «Արամ Խաչատրյան» համերգասրահում, քանի որ այն ունի թեքահարթակներ և հնարավորություն է տալիս մշակութային ծրագրերին ներգրավել նաև անվասայլակով տեղաշարժվող երեխաներին։ Հաշմանդամ երեխաների ծնողների «Վահան» բարեգործական ՀԿ-ի նախագահը նշում է նաև, որ վերջին տարիներին փոխվել է հանրության վերաբերմունքը հաշմանդամների նկատմամբ. «Եթե տարիներ առաջ մեր երեխաներին փողոցում տեսնելիս զարմացած հայացքով էին նայում, ապա այսօր նույնը չես նկատի, մարդիկ մեծ ջերմություն են տածում հաշմանդամների նկատմամբ, հոգատար են և հարկ եղած դեպքում նաև օգնության ձեռք են մեկնում»։