Ես ԱԺ-ում ոչ ոքի հետ չեմ շփվել. Վահե Էնֆիաջյան

«2 օր շարունակ ջերմելուց հետո որոշեցի թեստ հանձնել պարզվեց կորոնավիրուսով եմ վարակվել։  Թեստը հանձնել եմ երեկ, այսօր արդեն ստացա դրական պատասխան։ Այս պահին տանն եմ և դեռ 14 օր պետք է մեկուսացած մնամ, որի ընթացքում որոշակի ընթացակարգեր պետք է անցնեմ, թոքերս պետք է նկարեն, որովհետև եթե թոքաբորբի նախանշաններ լինեն կնշանակի, որ փոքր-ինչ դժվար հաղթահարելի կարող է լինել հիվանդությունը, բայց եթե նախանշաններ չլինեն՝ հեշտ կհաղթահարեմ»,- ԼՈՒՐԵՐ․com-ի հետ զրույցում ասաց ԱԺ ԲՀԿ պատգամավոր, ԱԺ փոխխոսնակ Վահե Էնֆիաջյանը։

Հարցին՝ հաշվի առնելով Ձեր ակտիվությունը մտավախություն չունե՞ք, որ հնարավոր է Ձեր գործընկերներին և ԲՀԿ համակիրներին ևս վարակած լինեք, քանի որ վերջին շրջանում ակտիվ շփումների մեջ էիք. «Ես ԱԺ-ում ոչ ոքի հետ չեմ շփվել, իմ աշխատասենյակում ծանոթացել եմ քաղաքացիների նամակներին։ Այս առումով անհոգ եմ և ներքին համոզմունք ունեմ, որ իմ միջոցով կորոնավիրուսը խորհրդարան չի կարող ներթափանցել»,- նշեց նա՝ ընդգծելով, որ ինքը պահպանել է բոլոր կանոնները։ 

Էնֆիաջյանի խոսքով՝ բոլոր նրանք, որոնք ունեն նախանշաններ պետք է թեստավորում անցնեն, քանի որ կարծում է, որ բազմաթիվ մարդիկ վարակված են, բայց չեն զգում և գուցե լուրջ չեն վերաբերում դրան։ 

Նշենք, որ Վահե Էնֆիաջյանի հայտարարությունից հետո համացանցում սկսեցին քննարկել, թե ԱԺ-ում կորոնավիրուսը նոր թափ է առնելու: