ԱՄՆ-ն եւ Թուրքիան որոշում են, թե ինչպես օգնեն Բաշար Ասադի հակառակորդներին

Ինչպես հաղորդում է իսրայելական «ISRAland» պարբերականը, Միացյալ Նահանգները եւ Թուրքիան որոշում են թե ինչպես օգնեն Սիրիայի ընդդիմությանը, եթե վերջիններիս հաջողվի տապալել Բաշար ալ-Ասադի իշխանությունը։

Այս մասին Անկարայում լրագրողներին հայտնել է ԱՄՆ-ի փոխնախագահ Ջո Բայդենը: Դեկտեմբերի 3–ի երեկոյան Ջո Բայդենին իր առանձնատանը ընդունել էր վարչապետ Ռեջեփ Թայիփ Էրդողանը։ Նրանք մի քանի ժամ քննարկել են Սիրիայում տիրող իրավիճակը, սակայն կոնկրետ քայլերի շուրջ ընդհանուր համաձայնություն ձեռք չեն բերել։

«Reuters» լրատվական գործակալությունը մեջբերել է Թուրքիայում լրագրողների հետ հարցազրույցի ժամանակ Բայդենի խոսքերը.

«Առաջին հերթին մենք պետք է տեսնենք Ասադի ռեժիմի տապալումը, այնուհետև նոր կորոշենք, թե ինչպես է միջազգային հանրությունն ամրապնդելու նոր ռեժիմը։ Միացյալ Նահանգները կշարունակի խաղալ կենտրոնական դեր ամբողջ տարածաշրջանում՝ սկսած Իրաքից եւ Իրանից մինչև «Արաբական գարնան» երկրներ։ Դա տրամաբանական է, որ մենք համակարգում ենք գործողությունները մեր դաշնակիցների հետ, ովքեր մեզ հետ կիսում են ընդհանուր ռազմավարական շահերը»: