Ինչու Արսեն Թորոսյանը ներկա չէր ԵՊԲՀ-ի միջոցառմանը

Երեկ տեղի ունեցավ Մխիթար Հերացու անվան պետական բժշկական համալսարանի գիտական խորհրդի նիստը. 899 շրջանավարտ առաջին համալսարանական հիվանդանոցի բակում Հիպոկրատի երդում տվեց: Ներկա էին ԿԳՄՍ նախարար Արայիկ Հարությունյանը, ռեկտոր Արմեն Մուրադյանը, ֆակուլտետների դեկանները և դասախոսական կազմը: Գիտական խորհրդի անդամները ավարտական երեկոյին միացել էին առցանց: 

Ելույթով ու ողջույնի խոսքով հանդես եկան Արմեն Մուրադյանը և Արայիկ Հարությունյանը, ներկա չէր Առողջապահության նախարար Արսեն Թորոսյանը: ԵՊԲՀ աշխատակազմի ղեկավար Շուշան Դանիելյանը  ԼՈՒՐԵՐ.com-ի հետ զրույցում նշեց, որ դա պայմանավորված է  համաճարակային կանոններով. «Մեր լիազոր մարմինը  ԿԳՄՍ նախարարն է և միայն իրեն էինք հրավիրել»,-նշեց նա: 

Նկատենք, որ նախորդ տարիներին ԵՊԲՀ ավարտական երեկոն նշվել է մեծ շուքով,  ներկա է եղել շուրջ 1000 մարդ՝ այդ թվում վարչապետը, Ան նախարարը և այլ պաշտոնյաներ: 

Իհարկե միամտություն կլինի հավատալ այն մտքին, որ համաճարակային կանոններից ելնելով՝ միայն Արսեն Թորոսյանն էր խանգարում այդ միջոցառմանը․ սա խոսում է պարզապես այն մասին, որ Արսեն Թորոսյան-Արմեն Մուրադյան հակամարտությունը պիկին է հասել, քանի որ Թորոսյանն այդ միջոցառման հետ պարզապես ուղիղ կապված մարդ է:

Թե ինչու Արսեն Թորոսյանը ներկա չէր այդ միջոցառմանը՝ փորձեցինք ճշտել ԱՆ խոսնակ Ալինա Նիկողոսյանից, որը խոստացավ մեզ ավելի ուշ պատասխանել և այդ պատասխանը ստանալուն պես խոստանում ենք այն հրապարակել:

Լուսանկարներ նախորդ տարվա միջոցառումից