Արևմտաասիական հավանական պատերազմը

Աշխարհը գտնվում է լայնածավալ զինված բախման նախաշեմին, որն իր մասնակից երկրներով և օգտագործվող զենքով առնվազն կարելի է համարել Երրորդ համաշխարհային պատերազմ, կամ էլ, առավելագույնը, Արևմտյան Ասիայի մեծ պատերազմ,-գրում է inosmi.ru-ն՝ հղում անելով վենեսուելացի վերլուծաբան Սիմոն Սաբանին։

Վերլուծաբանի խոսքերով՝ հակամարտության շուրջ ձևավորվել է դաշնակցական պետությունների երկու խումբ. մի կողմից՝ ՆԱՏՕ-ի (մասնակցությամբ Իսրայելի և Հորդանանի), մյուս կողմից՝ Պարսից ծոցի արաբական երկրների համագործակցության խորհրդի (Սաուդյան Արաբիա, Քաթար, Միացյալ Արաբական Էմիրություններ, Բահրեյն, Քուվեյթ, Օման), նրանց կարելի է ավելացնել նաև Լիբանանը, Թունիսը և Մարոկկոն։ Հնարավոր է նաև Ադրբեջանի և Վրաստանի մասնակցությունը։

«Անշուշտ, ԱՄՆ-ի և ՆԱՏՕ-ի դաշնակիցները բազմաթիվ են, այնպես որ այս հակամարտության մեջ կարող են ներքաշվել նաև այն երկրները, որոնք ընդհանրապես ոչ մի կապ չունեն Արևմտյան Ասիայի հետ»,- այսպիսին է վերլուծաբանի կարծիքը։ «Հակամարտության դաշնակից երկրների մյուս խմբում առաջնային է Սիրիան, որի ներսում ընթանում է քաղաքացիական պատերազմ, որը փոքրիկ քայլերով վերածվում է տարածաշրջանային արյունահեղ պատերազմական գործողությունների։ Նրան են միանում Իրանը և Հավաքական անվտանգության պայմանագրի կազմակերպության անդամներ Ռուսաստանը, Ղազախստանը, Բելոռուսը, Ղրղզստանը, Հայաստանը, Տաջիկստանը և Ուզբեկստանը համատեղ Համագործակցության շանհայյան կազմակերպության՝ Չինաստանի գլխավորությամբ։ Ամենայն հավանականությամբ դաշնակից պետությունների այս խումբը քաղաքական աջակցություն կստանա Վենեսուելայի, Կուբայի, Ալժիրի և Հյուսիսային Կորեայի կողմից։ Այնուամենայնիվ, բուն հակամարտությանը նրանք դժվար թե մասնակցեն։

Ինչևիցե, ընդհանուր առմամբ կարելի է ենթադրել, որ տարածաշրջանային այս հակամարտությունը և պայմանական այս երկու խմբերի ակտիվությունը կվերածվի լայնածավալ կործանիչ պատերազմի և դաժանությամբ ու արյունահեղությամբ կգերազանցի ոչ միայն Երկրորդ համաշխարհային պատերազմի, այլ ժամանակակից արաբաիսրայելական, Իրաք-Քուվեյթ, Իրաք-ԱՄՆ, Աֆղանստան-ԽՍՀՄ, Աֆղանստան-ԱՄՆ, Լիբանան, Սիրիա, Հայաստան-Ադրբեջան հակամարտությունները, անգամ կորեական, վիետնամական, անգոլական և Կենտրոնական Ամերիկայի պատերազմները»,-հավելում է վերլուծաբանը։