Թուրք դեսպանի խոստովանությունը

«Հայաստանը ամրապնդում է «ցեղասպանության» արշավները Ֆրանսիայում և Իսրայելում»։ Ահա այսպես է վերնագրված հերթական հոդվածը թուրքական «Hurriyet» թերթում Թուրքիայում տաբու հանդիսացող թեմայի վերաբերյալ։

Հայաստանը արագացրել է իր ջանքերը ցեղասպանության պահանջների վերաբերյալ հայերի 1915թ. սպանությունների 100-ամյա տարեդարձին ընդառաջ՝ նախաձեռնելով երկու գործողություններ Ֆրանսիայում և Իսրայելում, որոնց հետ Թուրքիայի հարաբերությունները վատթարացել են վերջին տարիների ընթացքում։

Երևանի Հայոց ցեղասպանության թանգարան-ինստիտուտը և Երուսաղեմում Հոլոքոստի «Յադ Վաշեմ» թանգարանը հաստատելու են համագործակցություն բազմաթիվ ոլորտներում ՝ համաձայն Իսրայելի նախարարի հայտարարության։ Իսկ ահա հաղորդումները Ֆրանսիայից ևս խոսում են այն մասին, որ նոր հրատարակված պատմության դասագրքերը պարունակում են Հայոց ցեղասպանության պահանջներ, մի քայլ, որը կարծես ավելի է շարունակելու լարվածության մեջ պահել արդեն լարված հարաբերությունները Անկարայի հետ։

«Ես առաջարկեցի Ցեղասպանության թանգարան-ինստիտուտի վարչակազմին համագործակցել Երուսաղեմում Հոլոքոստի «Յադ Վաշեմ» թանգարանի հետ,-Իսրայելի տեղեկատվության և սփյուռքի նախարար Յուլի Էդելշտայնի խոսքն է մեջ բերել panarmenian.net լուրերի կայքէջը։- Մեր երկու ժողովուրդները մարդկության դեմ սարսափելի հանցագործությունների զոհեր են։ Կարծում եմ՝ երկու կառույցները բավական արդյունավետ կերպով կհամագործակցեն օրինակների ընտրման և հարթակների կազմակերպման հարցերում»,- ասաց Էդելշտայնը իր՝ Երևան այցի ժամանակ օգոսոտսի 24-ին։

Չնայած Իսրայելը պաշտոնապես չի ճանաչում Հայոց ցեղասպանությունը՝ Էդելշտայնը Երևանի Ցեղասպանության ինստիտուտի այցելուների գրքում գրեց հետևյալը. «Իսրայելում ոչ ոք չի ժխտում Հայոց ցեղասպանության փաստը»։

Թուրք պաշտոնաթող դեսպան Սյուհա Ումարի խոսքով՝ այս երկու զարգացումները թուրքական արտաքին քաղաքականության ձախողման նշան են, որի պատճառը Թուրքիայի դրսևորած թուլությունն է այս հարցում։