Փայլակ Հայրապետյան. Եղբորս ինքնասպանությունը պատահականություն է

«Հրապարակ» օրաթերթը գրում է. «Մոտ տասն օր առաջ ինքնասպան եղած Միշա Քալանթարյանի դեպքի շուրջ տարբեր վարկածներ են շրջանառվում: Ոմանք կարծում են, թե դա բնավ էլ ինքնասպանություն չէ' կատարվածը կապելով 2002-ին տեղի ունեցած Հովիկ Մանուկյանի աղմկոտ սպանության հետ, որի կատարման մեջ Միշա Քալանթարյանն ընդունել էր իր մեղքը, սակայն դատարանը նրան անմեղսունակ էր ճանաչել և ազատել քրեական պատասխանատվությունից: Որոշներն էլ պնդում են, որ դա ինքնասպանություն է և կապ չունի Քալանթարյանի արարքների հետ: Իսկ նրա հարազատ եղբայրը' Փայլակ Հայրապետյանը համոզված է, որ կատարվածը պատահականություն է: Դեպքի հետ կապված «Հրապարակը» զրուցել է նրա հետ: Հարցազրույցն ամբողջությամբ ներկայացնում ենք ստորև.

-Պարոն Հայրապետյան, մամուլում գրվեց, որ Ձեր եղբոր հետ տեղի ունեցածը գուցե ինքնասպանություն չէ: Ինչպե՞ս է տեղի ունեցել դա, կպատմե՞ք: Ի՞նչը, ըստ Ձեզ, կարող էր 70 տարեկան մարդուն դրդել ինքնասպանության:

-Այո, ես դեպքից հետո եղել եմ այնտեղ, և ինքնասպանության ոչ մի հարց չկա: Նա այնքան էր սիրում ինքն իրեն, իր ընտանիքը: Նա ունի սուրբ ընտանիք, սուրբ երեխաներ, նա ունի սուրբ թոռներ, նա ապրում էր բարձր մակարդակի վրա: Առիթը չկար, որ նա ինքնասպան լիներ, այդպիսի առիթ գոյություն չուներ: Բայց իր մոտ մի սխալ բան ուներ: Ինչպե՞ս է, որ հեռախոսն ամբողջ օրը մեր ձեռքին է, այնպես էլ նրա մոտ իր զենքն էր ամբողջ օրը ձեռքին: Նստած է եղել, զենքը քանդել է, ինձ թվում է' հավաքելու ժամանակ փողի մեջ փամփուշտ է մնացած եղել, և հենց դա էլ կրակվել ա:

-Այսինքն' Դուք կարծում եք, որ դա զուտ պատահականությո՞ւն է:

-Այո, զո՛ւտ պատահականություն, ես կասեի'շատ պատահականություն: Նա ինքնասպան լինելու ոչ մի պատճառ չուներ: Չորս երեխա ուներ, չորսն էլ սուրբ, բոլորն էլ ամուսնացած: Ինքն ապրելու մեջ շատ ճոխ էր: Իր ապրելակերպն այսօր շատ քիչ մարդ կարող է ունենալ: Ոչ թե եսիմինչ' լկտի ձևով էր ապրում, այլ ամենաբարոյական կյանքով: Դրա առիթը չկար:

- Իսկ ինչո՞ւ էր զնեքը միշտ մոտը պահում: Վախի զգացողությո՞ւն ուներ: Պաշտպանվո՞ւմ էր ինչ-որ մեկից:

- Չէ, պարզապես սովորություն էր, սեր զենքի հանդեպ:

- Իսկ գուցե թշնամիներ ուներ, խնդիրներ: Խոսվում է նաև, որ կարող էր կապված լինել Հովիկ Մանուկյանի սպանության հետ:

- Չէ, չէ: Նման բանի համար պետք էր, որ տունը արդ մտած լիներ, բայց տան ամբողջ տարածքը տեսահսկվում է, կամեռաներ են տեղադրված: Բացառվում է, որ այդ տուն մարդ մտած լիներ: Ինքն այդ օրը գործի տեղից գնացել է տուն, ընկերոջ հետ ճաշել են, հետո դուրս է եկել, նրան ճանապարհել է, ապա կնոջից սուրճ է ուզել ու գնացել իր սենյակ՝ շորորը փոխելու: Նստել է, երևի զենքը վերցրել է ձեռքը, քանի որ ինչ ժամի էլ գնաիր, զենքը ձեռքն էր ու մաքրելուց պատահաբար կրակել է: Նա այդպես էլ մնացել էր նստած տեղը: Դա պատահականություն է:

- Իսկ գուցե պարտքեր կամ կամ գումարային խնդիրներ ունի

- Չէ, ինչե՞ր եք ասում: Նա չէր կարող պարտքեր ունենալ: Նա շատ լավ, ապահովված կյանքով էր ապրում:

- Գրվեց նաև, որ Ձեր եղբոր ինքնասպանությունը կապված է Աշոտ Սուքիասյանի՝ Ձեզ անանկացնելու փորձի հետ:

- Ոչ, դա բացառված է: Այս գործի հետ ոչ մեկը, բացի ինձանից, կապ չունի: Ոչ Միշան, ոչ իմ տղաները, ոչ իմ թոռները, ոչ իմ բարեկամները, բացարձակապես ոչ մեկը կապ չունի իմ խնդիրների հետ: Ես բոլորին հեռու եմ պահել այս գործերից: Բոլորին էլ ասել եմ՝ իմ ստեղծածն է, ես եմ տարիների ընթացքում ստեղծել էս ամեն ինչը, իմ համաձայնությամբ է եղել դա, ես եմ գրավ դրել այդ ամենը և ես էլ կլուծեմ էս խնդիրը, չի ստացվի՝ թող կորի, ինչ է եղել որ: Միշան, առավել ևս նրա ինքնասպանությունը, կրկնում եմ, ոչ մի կապ չունի այդ գործի հետ, դա բացառված է:

Հիշեցնենք, որ ավելի վաղ Lurer.com-ը հայտնել էր, որ իրականում գործարար Միշա Քալանթարյանն ատրճանակն անզգուշությամբ օգտագործելիս կրակել է ինքն իր վրա: