«ՉԻ». ՏԻՄ ընտրություններն ամենախոցելին են. Լևոն Զուրաբյան

Վերջին շրջանում իշխանական քարոզչամեքենան պարբերաբար անդրադառնում է այն թեմային, թե ինչու Հայ ազգային կոնգրեսը հնարավորինս լայն մասնակցություն չունի ՏԻՄ ընտրություններին։ Տարբեր մեթոդներով փորձում է հավասարեցման գիծ դրվել ՏԻՄ ընտրությունների և ԱԺ ու նախագահական ընտրությունների միջև, իբրև թե, եթե խնդիրը կեղծիքն է, ապա պետք չէր մասնակցել նաև ԱԺ ընտրություններին, և նույն կերպ նաև սպասվող նախագահական ընտրություններին։

Կոնգրեսի համակարգող, ԱԺ պատգամավոր Լևոն Զուրաբյանը «ՉԻ» հետ զրույցում պարզաբանել է, որ հավասարության նշան ուղղակի չի կարելի դնել, քանի որ տարբեր ընտրությունների  պարագայում տարբեր իրավիճակներ են ստեղծվում։ Զուրաբյանը նշել է, որ Հայաստանում ընտրություններ, որպես այդպիսին, գոյություն չունեն։ Հայաստանում գործում է դեմոկրատական ֆասադով թաքնված բռնապետություն, որը օգտագործում է իր բոլոր լծակները՝ ապօրինությունները, ընտրակեղծիքներ, ընտրակաշառք՝ արդյուքում  ընտրությունները կեղծելու և իշխանությունների դիրքերը ամրապնդելու նպատակով։

Զուրաբյանի խոսքով, նման ընտրություններին մասնակցելն իմաստ կունենար միայն մեկ դեպքում՝ եթե դրանցով հաջողվեր թուլացնել ռեժիմը, մոբիլիզացնել ժողովրդին, փոխել քաղաքական մթնոլորտը, ինչպես 2008-ին։ Այս առումով, Երևանի ավագանու ընտրություններում Կոնգրեսի մասնակցությունն, ըստ Զուրաբյանի մեկ նպատակ ուներ՝ եթե ընտրությունների արդյունքում հաջողվեր հասնել մեծամասնության, ապա Հայաստանում կձևավորվեր երկիշխանություն։ Այդ իրողության դեմը իշխանությունները կարողացան առնել միայն լայնածավալ կեղծիքներով և բռնություններով։ ԱԺ ընտրությունների սպեցիֆիկան մի փոքր այլ է։ Զուրաբյանի խոսքով, ԱԺ ընտրությունները ևս կարևոր են, չնայած դրա մոբիլիզացիոն ներուժը զիջում է նախագահականին, բայց հնարավորություն է տալիս թափանցել ԱԺ և ԱԺ ամբիոնը օգտագործել շարժման քաղաքական օրակարգը առաջ տանելու համար։ Երևանի ավագանու ընտրություններում դա հնարավոր չէր, քանի որ չէր հաջողվել ստանալ մեծամասնություն։

Իսկ ահա ՏԻՄ ընտրությունները, Զուրաբյանի խոսքով, ամենախոցելի ընտրություններն են, որտեղ գործի են դնում վարչական ճնշումները, ընտրակաշառքը և այլն։

«Հաշվի առնելով այն հանգամանքը, որ նման ըմնտրություններում ժողովրդի քաղաքական մոբիլիզացիան գրեթե բացակայում է, մենք որոշել ենք այդ ընտրություններին մասնակցելու հարցը թողնել տարածքային նախաձեռնություններին»,- նշել է Զուրաբյանը։

Նրա խոսքով, ովքեր համարել են, որ անգամ այս կեղծիքների դեպքում հնարավոր է առաջադրվել, նրանք առաջադրվել են և ստացել են Կոնգրեսի աջակցությունը։