Հալեպում մեծ թվով «վարձկան» ահաբեկիչներ են վնասազերծվել

Սիրիայի կառավարական զորքերը գրեթե ամբողջությամբ վնասազերծել են քաղաքն ահաբեկող «վարձկաններին»՝ հաղորդում է ИТАР-ТАСС-ը՝ հղում կատարելով Սուրիա ալ-Էն լրատվական գործակալությանը:

Ըստ գործակալության ունեցած տվյալների՝ ընդդիմության զինված խմբավորումները լքել են Ինզարատ, Ազիզիա, Սուլեյմանիա և Զրազիր շրջանները:

Իզաա թաղամասում գտնվող Հալեպի հեռուստառադիոկենտրոնից և Թանանիր հրապարակի տարածքից զինյալների փախուստի բոլոր փորձերը ձախողվել են: Հղում կատարելով զինվորական շրջանակներին՝ ԶԼՄ-ները հայտնում են, որ զինյալների ձեռքում շարունակում են մնալ մի քանի շրջաններ:

«Մեկ օրվա ընթացքում ոչնչացվել են մեծ թվով «վարձկան» ահաբեկիչներ, առգրավվել է աննախադեպ քանակությամբ զենք-զինամթերք»,- նշված է Սիրիայի կառավարական զորքերի տարածած պաշտոնական հաղորդագրության մեջ:

Ըստ ֆրանսիական AFP գործակալության տվյալների՝ վերջին մի քանի օրվա ընթացքում Դամասկոսի մերձակայքում զոհվել է ընդհանուր առմամբ 59 մարդ։