Hurriyet. Թուրք նախարարը Հայոց ցեղասպանությունը որակել է «անհեթեթ բաներ» եզրույթով

Ինչպես նշում է թուրքական «Hurriyet» թերթը, Թուրքիայի ԵՄ նախարար Էգեմեն Բաղիսը խստորեն դատապարտել է Հայոց ցեղասպանության ներկայացումը ֆրանսիական գրքերում։

Բաղիսը կոչ է արել ֆրանսիացիներին վերաքննել իրենց սեփական ազգային կարգախոսի ըմբռնումը, մի ժողովուրդ, որը մեծ պատվով է վերաբերվում իր՝ արժեքավոր «Ազատություն, հավասարություն, եղբայրություն» սկզբունքների վրա հիմնադրված պետությանը։ «Հուսով եմ՝ շուտով նրանք կհասկանան այս սխալն ու կուղղեն այն»։ 

«Թուրքիան չգիտի՝ ինչ է ցեղասպանությունը։ Թուրքիան գիտի «խաղաղություն տանը, խաղաղություն աշխարհում» արտահայտությունները, ինչպես ասել է մեր հանրապետության հիմնադիր Աթաթուրքը։ Մենք փորձում ենք խաղաղություն տարածել աշխարհով մեկ, մենք փորձում ենք սեր տալ»,-անկեղծացել է Բաղիսը։

«Գաղութատիրական համակարգ չի եղել այն վայրերում, որտեղ որ մենք եղել ենք առաջ»,-ասել է նա՝ ակնհայտորեն ակնարկելով Ֆրանսիայի գաղութատիրական անցյալը։ «Որտեղ մենք գնացել ենք, միշտ եղել է բարգավաճում և համբերատարություն։ Այս անհեթեթ բաները դասագրքերում տեղադրելու փոխարեն նրանք պետք է վերաքննեն «Ազատություն, հավասարություն, եղբայրություն» սկզբունքների իրենց ըմբռնումը։ Մենք խորհուրդ ենք տալիս՝ ԵԱՀԿ-ն ավարտի լարվածությունը Հայաստանի և Ադրբեջանի միջև։ Մենք հուսով ենք, որ նրանք կարող են դադարել կենտրոնանալ ընտրությունների վրա և կենտրոնանալ ապագա սերունդների վրա ազդող հարցերի վրա ինչքան հնարավոր է շուտ։ Մենք հուսով ենք՝ Թուրքիան կլինի ԵՄ-ի համար մի միջոց ՝ դուրս գալու այն բարոյական անդունդից, որտեղ այն ընկել է»։

Պարզապես ծիծաղ է առաջացնում թուրք նախարարի տեսակետը իրենց փայլուն հանրապետության անցյալի վերաբերյալ։ Ի դեպ, սա այն նույն նախարարն է, ով Ցյուրիխում և Դավոսում հրապարակայնորեն հայտարարել է, որ 1915թ. դեպքերը չեն եղել ցեղասպանություն։ Իսկ ահա նրան չեն ձերբակալել նրա դիվանագիտական անձեռնմխելիության շնորհիվ, չնայած՝ Ցյուրիխի իշխանությունները նախնական հետաքննություն էին սկսել նրա դեմ։ Հիշեցնենք, որ Շվեյցարիայում գործում է օրենք, որը քրեականորեն հետապնդում է բոլոր նրանց, ովքեր ժխտում են բոլոր, այդ թվում՝ Հայոց ցեղասպանության փաստը։

Հատկանշական է, որ թուրք նախարարը բնութագրել է Հայոց ցեղասպանության մասին տեղեկությունները մի եզրույթով, որն ամենաքիչը ապշանք է առաջացնում, չնայած՝ արդեն սովորական են դարձել նման հայտարարությունները թուրք ազգայնամոլ քաղաքական գործիչների կողմից։ Նրա կարծիքով՝ դրանք «անհեթեթ բաներ» են։ Այս հայտարարությունը Թուրքիա պետության ևս մեկ դրսևորումն է առ այն, որ նա դեռևս ի վիճակի չէ հաստատել բարեկամական հարաբերություններ իր բոլոր հարևանների հետ և կոտրել այդ մերժողական քաղաքականությունը՝ շարունակելով պնդաճակատ արտաքին քաղաքականություն վարել Հայաստանի Հանրապետության դեմ։