Արևմտյան մի շարք երկրների հատուկ նշանակության ուժերը Սիրիայում են. ИТАР-ТАСС

Արևմտյան մի շարք երկրների (այդ թվում նաև՝ Մեծ Բրիտանիայի) հատուկ նշանակության ուժերը, որոնց կազմում կա մի քանի հարյուր զինվորական, ներթափանցել են Սիրիայի տարածք՝ քիմիական և կենսաբանական զենք փնտրելու նպատակով։ Այս մասին հայտնում է ИТАР-ТАСС-ը՝ հղում կատարելով արևմտյան ԶԼՄ–ներին։ Վերջիններիս տվյալներով՝ հատուկ գործողությունը ղեկավարվում է մի շարք երկրների հետախուզական ծառայությունների կողմից, այդ թվում նաև՝ ամերիկյան, բրիտանական և ֆրանսիական։

Ինչպես ավելի վաղ հայտնել էին բրիտանական ԶԼՄ–ները, հատուկ նշանակության ուժերը նախապատրաստվում էին «ասադյան ռեժիմի անկման դեպքում իրականացնել քիմիական զենքի զինապահուստների գրավման և ոչնչացման» գործողություն։

Times պարբերականի տեղեկություններով՝ «Սիրիայի տարածքում հայտնաբերվել են քիմիական զենքի արտադրության 4 հիմնական օբյեկտներ՝ Հալեպ, Լաթակիա, Հոմս և Համա քաղաքների մոտակայքում»։ Սակայն, պարբերականի հաղորդմամբ, «երկրի մյուս շրջաններում գոյություն ունեցող զինապահուստների վերաբերյալ հետախուզական տվյալներն ավելի անորոշ են»։