Գիտությամբ զբաղվելը նույնքան առաջնային է, որքան ԶՈՒ-ում ծառայելը․ չծառայած Գևորգ Պապոյանը պատրաստ է գնալ սահման

ԼՈՒՐԵՐ․com-ը շարունակում է պատգամավորներին «կամավորագրելու» իր շարքը։ Այս անգամ էլ որպես կամավոր սահման գնալու է պատրաստ երբեք չծառայած, սակայն դրա համար անասելի փոշմանած իմքայլական պատգամավոր Գևորգ Պապոյանը։

Մեզ հետ զրույցում պատգամավորը նախ անդրադարձավ սահմանին տիրող իրավիճակին․ «Մեր բանակի մարտական պատրաստվածութան աստիճանը, զինամթերքով հագեցվածությունը, ոգին, ինչպես նաև այլ հարակիից գործոնները ապահովում են որպեսզի որևէ խնդիր չլինի սահմանին։ Նշեմ նաև, որ հեղափոխության հենց հաջորդ տարում ռազմական բյուջեն ավելացել է քսանհինգ տոկոսով, որի շնորհիվ ձեռք է բերվել գերժամանակակից զինտեխնիկա, բարձրացվել է զինվորականների աշխատավարձը։ Սրանք կարևոր պայմաններ են. երբ մենք զինվորներից որևէ բան ենք ակնկալում և նրանք մեր ակնկալիքները արդարացնում են՝ մեր սահմանները անառիկ պահելով, մենք էլ որպես պետություն պարտավոր ենք համարժեք արձագանքել հայոց բանակին»,- նշեց պատգամավորը։

Գևորգ Պապոյանը ընդգծեց, որ մեր ժողովրդի հետ որևէ մեկը այլևս չի կարող վարվել այնպես, ինչպես օրինակ վարվել են նախորդ դարի սկզբնամասում։ Ըստ Պապոյանի՝  էականորեն փոփոխություն է եղել ազգային գիտակցության մեջ, այն է՝ մենք ենք մեր անվտանգության երաշխավորը  առաջին հերթին դարձել, և այս առումով պետությունը և ժողովուրդը միակամ է մտածում։

Պատգամավորը մեզ հետ զրույցում անկեղծացավ, նշելով, որ կամավոր լինելու մասին արդեն իսկ մտածել էր․ «Չնայած այն հանգամանքին, որ ես չեմ ծառայել, բայց ցանկացած պահի ես պատրաստ եմ ցանկացած գործողութան մեջ ներգրավվելու ինժեներականից մինչև մարտական, իհարկե, համապատասխան պատրաստվածություն անցնելուց հետո, բայց վստահաբար ես հպարտ ու հաստատակամ հայտարարում եմ, որ, անհրաժեշտության դեպքում, այդ կամավորներից մեկը ես եմ լինելու, որը կլինի Տավուշում, Արցախում, կամ որևէ ալ վայրում, ես համարում եմ դա իմ պարտավորութունը պետության և հայրենիքի առաջ»,- ասաց Գևորգ Պապոյանը։

Գևորգ Պապոյանը մեզ հայտնեց նաև ԶՈՒ- ում իր ծառայութուն չանցնելու պատճառի մասին․ «Ես զբաղվել և մինչև հիմա էլ զբաղվում եմ գիտությամբ, ես տնտեսագիտության թեկնածու եմ, դոցենտ, դասախոս եմ և ոչ թե ձևական եմ էդ պրոցեսի մեջ մտել, որ ստանամ գիտության թեկնածուի աստիճան և հետո ուղղակի այդ եղանակով բանակից ազատվեմ, ինչպես շատերը,  այլ՝ մինչև այժմ էլ ես գիտության մեջ եմ։ Ես օրենքով սահմանված կարգով բանակից ազատվել եմ»,- նշեց պատգամավորը։

Ինչպես հասկացանք պատգամավորի հետ զրույցից, եթե հիմա նա լիներ տասնութ տարեկան, ապա կլիներ ԶՈՒ-ում՝ ծառայութան մեջ․ «Եթե հիմա լինեի տասնութ տարեկան, կարծում եմ՝  կգնայի բանակ, կգայի, նոր կշարունակեի գիտությամբ զբաղվելը, բայց գիտամանկավարժական աշխատանքով միանշանակ կզբավեի, որովհետև այդ գործը ես համարում եմ նույնպես շատ կարևոր, արժանի և պետքական գործ և նույնիսկ ԱԺ պատգամավոր դառնալուց հետո ես էդ ուղղությամբ իմ աշխատանքները չեմ նվազեցրել»,- եզրափակեց պատգամավոր Գևորգ Պապոյանը։

Զվարթ Պետրոսյան