Սահմանին «սելֆիացավով» տառապողները և իրական հերոսները

Արդեն մի քանի օր է, ինչ սահմանում հարաբերական անդորր է, իսկ դա էլ իր հերթին նշանակում է, որ հարմար առիթ է ստեղծվել մերձիշխանական որոշ խմբերի համար մեկնել սահման և այնտեղից տարատեսակ հայրենասիրական լուսանկարներ հրապարակել, ասել է թե՝ տեսեք-տեսեք, մենք էլ ենք եկել աջակցելու մեր սահմանին կանգնած տղաներին, մեր սահմանին բնակվող հայրենակիցներին: Ընդ որում, սահման մեկնողների «սաստավը», մեղմ ասած, տարակուսանք է առաջացնում: Դրանք այն մարդիկ են, ովքեր բոլոր հնարավոր և անհնարին միջոցներով արդեն երկու տարուց ավելի է փորձում են թիրախավորել հայկական բանակը և գեներալիտետին:

Դիցուք՝ սա Դանիել Իոաննիսյանն է, «Իրազեկ քաղաքացիների միության» նախագահը, պատվավոր սորոսական, ով երբեք առիթը բաց չի թողել փնովելու ուժային կառույցներին: Նրա համար գեներալ Մանվելը հանցագործ էր, իսկ մեր մյուս գեներալները՝ ՌԴ-ում ապաստարան մուրացող վախկոտներ: Եվ հենց նա էր հայտարարում, որ ազգ-բանակ գաղափարախոսությունը ուղղակի պետականության արժեզրկմանն է ուղղված:

Սահմանից հաջորդ սելֆիի հեղինակը Նիկոլ Փաշինյանի նախկին խորհրդական Արսեն Խառատյանն է, ում պատկանող վրացալեզու կայքը, հիշեցնենք, հայկական կողմին մեղադրում էր ադրբեջանցի խաղաղ բնակիչների վրա կրակելու մեջ: Նույն Խառատյանը, ով ջանասիրաբար թուրք է ներում: Բանակից խոսում, բանակին թիրախավորում է մի մարդ, ով նույնիսկ չի էլ ծառայել այդ բանակում: 

Բերդ քաղաքում «հավերժացել» էր նաև «Ռեստարտ» նախաձեռնության համակարգող, քաղակտիվիստ Դավիթ Պետրոսյանը: Նա էլ իր հերթին յուրաքանչյուր առիթ օգտագործում է հայտարարելու համար, որ բանակում բազմաթիվ խնդիրներ կան, սակայն դրանց մասին ոչ բարձրաձայնվում է, ոչ էլ լուծում է տրվում: 

Իրավիճակի թեժության գրադուսի նվազելը Բերդ էր բերել նաև Հեղափոխության պահապանների անվախ անդամներին: Հիշեցնենք, հենց նրանք էին սպառնում ջարդել Արցախի նախագահի գլուխը, խոչընդոտում էին գեներալ Մանվելի ՝ ՔԿՀ-ից հիվանդանոց տեղափոխելը, հայկական զինված ուժերի համազգեստը հագնելով նսեմացնում էին մեր գեներալիտետի ձեռքբերումները, աջ ու ձախ սպառնալիքներ շաղ տալիս հող ազատագրածների հասցեին: Իսկ հիմա եկել են սահման և դուխով սելֆի են անում: 

Ընդ որում, նշենք, որ նախկինում էլ կարող էինք ականատես լինել նման իրավիճակների:Ամեն անգամ մարտական գործողություններից հետո Հայաստանի պաշտոնյաների շրջանում սահման գնալու «վիրուս» էր տարածվում: Փաստորեն, պաշտոնյաները, որոնցից շատերը տարբեր ձեւերով խուսափել էին բանակում ծառայելուց, այդ օրերին ինչ-որ տեղից զինվորական համազգեստ էին ձեռք բերում, հագնում եւ գնում են սահման ու այնտեղ նկարվելուց հետո վերադառնում: Այս հանգամանքի վրա ուշադրություն էր հրավիրել նաև ընդդիմադիր Նիկոլ Փաշինյանը, ով ՀՀԿ-ին մեղադրում էր սահմանին սելֆիներ անելու և զինվորի հաշվին փիառվելու մեջ: Հարց է առաջանում՝ իսկ ի՞նչ է փոխվել այսօր… Թերևս, ոչինչ. փիառվողները փիառվում են, իսկ իրական հերոսները շարունակում են լինել մեր սահմանապահ գյուղերի բնակիչները, ովքեր անկախ ամեն արհավիրքից չեն լքել և չեն լքի իրենց հայրենի օջախները...