«Ռուսաստանը հուսով է, որ հայ-ադրբեջանական սահմանին իրավիճակը արագ կկարգավորվի»․ Պեսկով
ՌուսաստանՌուսաստանը հույս ունի, որ Հայաստանի և Ադրբեջանի սահմանին իրավիճակը հնարավորինս արագ կկարգավորվի, և այս հակամարտության շուրջ հուզական ֆոնը կհանդարտվի, հայտարարել է ՌԴ նախագահի մամուլի քարտուղար Դմիտրի Պեսկովը՝ մեկնաբանելով Մոսկվայում առևտրի վրա այս հակամարտության ազդեցության մասին տեղեկատվությունը։ Նա նշել է, որ շատ ադրբեջանցիներ և ռուսաստանյան անձնագրերով հայեր ապրում են Մոսկվայում և ընդհանրապես Ռուսաստանում․ «Նրանք բոլորն էլ Ռուսաստանի Դաշնության հարգարժան քաղաքացի են, նրանք բոլորն էլ մեր հասարակության հարգված անդամներն են»,-նշել է նա: «Բայց ակնհայտ է, որ հայ-ադրբեջանական սահմանին էսկալացիան չի կարող այս քաղաքացիներին անտարբեր թողնել, և, իհարկե, նրանք զգացմունքայնորեն ցույց են տալիս իրենց արձագանքը», - նշել է Կրեմլի խոսնակը: Նա հիշեցրել է, որ Ռուսաստանի Դաշնությունը երկու կողմերին կոչ է անում զսպվածություն ցուցաբերել, անհապաղ վերադառնալ հրադադարին և դադարեցնել բռնության ցանկացած դրսևորում: