«Հայկական Ժամանակ». Ինչո՞ւ ինքնաբացարկ հայտնեց Մասիսի քաղաքապետի ԲՀԿ–ական թեկնածուն

Մասիսի քաղաքապետի արդեն նախկին թեկնածու, ԲՀԿ-ական Ավետիք Դալլաքյանը, ում որդին օրեր առաջ Մասիսում հնչած «նախընտրական» կրակոցներից հետո կալանավորվել էր, երեկ «ՀԺ»-ի թղթակցին հայտնել է, որ որդուն առաջիկայում ազատ կարձակեն:

Ինչպես տեղեկացրել էր թերթը, Դալլաքյանը նախօրեին ինքնաբացարկի դիմում էր ներկայացրել: ԲՀԿ նախագահ Գագիկ Ծառուկյանի հետ ԲՀԿ Մասիսի ակտիվի հետ հանդիպման ժամանակ որոշվել է, որ պայքարը Մասիսում պետք է շարունակի գործող ԲՀԿ-ական փոխքաղաքապետ Կարապետ Օհանյանը: «ՀԺ»-ի թղթակցի հարցին՝ ինչպե՞ս ընդունեցիք որոշումը, Դալլաքյանը պատասխանել է. «Ես Ծառուկյանի հետ հանդիպմանը ներկա չեմ եղել, առողջականս լավ չէր, սիրտս լավ չի, ճիշտն ասած՝ արդեն չէր էլ հետաքրքրում: Ես եմ գնացել, դիմում գրել: Որ Վալոդն այնտեղ է (որդին- Հժ), ես ինքս որոշեցի, որ չեմ կարող շարունակել պայքարը, ես չէի կարող ժողովրդի մեջ դուրս գալ, իմ տղան նստած, ես ի՞նչ ասեմ մարդկանց: Չե՞ն ասի՝ այ, անթասիբ մարդ, տղեդ նստած, դու դուրս ես եկել փողոցներով, ի՞նչ ես խոսում»: Երբ «ՀԺ»-ի թղթակիցը հարցրել է՝ ձեր ինքնաբացարկից հետո Մասիսում մթնոլորտը հանդարտվե՞լ է, պատասխանել է. «Հանգստացած են արդեն, հո դուշման չե՞նք: Այս շաբաթվա մեջ տղայիս խափանման միջոցը կփոխեն»:

Թերթը գրում է, որ Դալլաքյանը օրեր առաջ պնդում էր, որ Մասիսի միջադեպը հրահրել է Աժ ՀՀԿ-ական պատգամավոր Մուրադ Մուրադյանը: Երեկ ԲՀԿ անդամն ասել է. «Բոլորն էլ հանգստացել են, ամեն ինչ նորմալ է»: