«Հայկական Ժամանակ». Տնտեսվարողներն ահազանգում են. հարկային մարմիններն իսկական տեռոր են սկսել

«Տնտեսվարողներն ահազանգում են, որ գրեթե մեկ շաբաթ է, ինչ հարկային մարմիններն իսկական տեռոր են սկսել իրենց դեմ: Նախկինում՝ ամեն ամսվա 20-ից հետո, երբ տնտեսվարողներն իրենց հարկային հաշվետվությունները ներկայացնում էին հարկային մարմնին, վերջինս ևս մի 10 օր տալիս էր առաջացած հարկային պարտավորությունները մինչև վերջ կատարելու համար: Այս ամիս, սակայն, տնտեսվարողներին ժամանակ չի տրվել, և անմիջապես հարկայինը արգելանք է դրել բոլորի հաշիվների և գույքի վրա, ովքեր ամսվա աոաջին 20 օրվա ընթացքում հարկային բոլոր վճարումները չեն հասցրել անել, նաև տուգանել է հարկային վճարումները ուշացնելու համար:

Ըստ «ՀԺ»-ի տեղեկությունների՝ այս երևույթը համատարած բնույթ է կրում: Բացի դրանից, հարկայինի աշխատակիցները «բարի խորհուրդ» են տալիս տնտեսվարողներին՝ 15-25 տոկոսով մեծացնել իրենց կողմից վճարվող հարկերի ծավալները, հակառակ դեպքում՝ սպառնում են ստուգումներ սկսել: Սա, ինչ խոսք, պայմանավորված է բյուջեի հավաքագրման շուրջ ծագած խնդիրներով: Գումարները չեն բավարարում, և ինչպես արդեն նշել ենք՝ նույնիսկ կառավարության որոշումներով արդեն ծախսեր են կատարվում հաջորդ տարվա բյուջեի հաշվին՝ «նիսյայով»: Բացի այդ, երկրորդ կիսամյակում բյուջեով նախատեսված է զգալիորեն ավելի շատ հարկեր հավաքել, իսկ տնտեսության վիճակն այնպիսին է, որ կանխատեսված մակարդակով հարկահավաքության հեռանկարները, մեղմ ասած, այնքան էլ խոստումնալից չեն: Հարկային տեռորով, իհարկե, կարելի է ինչ-որ կարճ ժամանակահատվածում ցուցանիշներ ապահովել, բայց դրա հետևանքով տնտեսությունը պարզապես հյութաքամ կլինի:

Կարելի է, իհարկե, բյուջեով նախատեսված հարկերի ողջ ծավալը առանց մեծ դժվարության կատարել՝ տնտեսության ստվերային հատվածը կրճատելու հաշվին: Բայց դրա արդյունքում կշոշափվեն մեր օլիգարխների շահերը, քանի որ տնտեսության ստվերային հատվածը վերահսկում են հենց նրանք: Միաժամանակ, հենց նրանք են իշխանության հիմնական հենարանը և իրականում հենց նրանք են իրենց փողերով ու բանդաներով ձևավորում իշխանություն: Ուստի հուսալ, որ հարկերի հավաքագրման հիմնական բեռը կդրվի տնտեսության ստվերային հատվածի վրա, մանավանդ' նախագահական ընտրություններից մի քանի ամիս առաջ, երևի թե միամտություն է: Այնպես որ, շարքային տնտեսվարողները պետք է պատրաստ լինեն, որ Գագիկ Խաչատրյանի ղեկավարած պետեկամուտների կոմիտեն այս տեռորը շարունակելու է: Տեսականորեն սա կարող է որոշակի դժգոհություններ առաջացնել և բացասաբար ազդել իշխանության «ռեյտինգի» վրա առաջիկա նախագահական ընտրություններից առաջ, բայց' միայն տեսականորեն:

Գործնականում, ինչպես ցույց տվեցին մայիսի 6-ի ընտրությունները, Հայաստանում իշխանության ձևավորման առումով «ռեյտինգը» ոչինչ է, օլիգարխները՝ ամեն ինչ»,- գրում է «Հայկական Ժամանանակ»-ը: