Լավրովը հանդիպել է Ռուսաստանի հայ և ադրբեջանական համայնքների ներկայացուցիչների հետ

Լավրովը հանդիպում է անցկացրել Ռուսաստանում ադրբեջանական եւ հայկական համայնքների ներկայացուցիչների հետ, հայտնում է ՌԴ արտգործնախարարության պաշտոնական կայքը։

«Ռուսաստանի Դաշնության արտաքին գործերի նախարար Սերգեյ Լավրովը հանդիպումներ է ունեցել Ռուսաստանի ադրբեջանական եւ հայկական համայնքների նշանավոր ներկայացուցիչների՝ «Կիեւսկայա պլոշաձ» ՍՊԸ-ի տնօրենների խորհրդի նախագահ Գոդ Նիսանովի եւ «Ռուստաստանի հայերի միություն» համառուսաստանյան հասարակական կազմակերպության նախագահ Արա Աբրահամյանի հետ։ Քննարկվել է ադրբեջանական եւ հայկական համայնքների դերը Ռուսաստանի Դաշնության տարածքում ազգամիջյան խաղաղության եւ ներդաշնակության պահպանման գործում՝ գործող օրենսդրությանը համապատասխան: Նշվել է համատեղ բացատրական եւ կրթական աշխատանքի կարեւորությունը՝ ազգային պատկանելիության հիմքով Ռուսաստանի քաղաքացիների իրավունքների ոտնահարման դեպքերը կանխելու եւ վերացնելու համար: Կարեւորվել է ադրբեջանական եւ հայկական համայնքների կառուցողական ներդրման անհրաժեշտությունը Բաքվի եւ Երեւանի միջեւ հարաբերությունների բարելավման խթանման համար պայմանների ստեղծման գործում»,- ասված է հաղորդագրության մեջ: