«Առավոտ». Գագիկ Մինասյանը խուսափում է մեկնաբանել Հրանտ Բագրատյանի դիտարկումները

ՀՀ նախկին վարչապետ Հրանտ Բագրատյանը ՀՀ Կառավարության կողմից ներկայացված տնտեսական աճի ցանկացած ցուցանիշի մասին խոսելիս շեշտում է, որ այդ թվերը «բլեֆ» են։ Երեկ «Առավոտ»-ը ԱԺ ֆինանսավարկային և բյուջետային հարցերի մշտական հանձնաժողովի նախագահ Գագիկ Մինասյանին խնդրեց անդրադառնալ նախկին վարչապետի նման թերահավատությանը։ Պարոն Մինասյանը բոլոր հնարավոր տարբերակներով խուսափեց մեկնաբանել գործընկերոջ դիտարկումները՝ նշելով, որ ինքը հակառակն է ապացուցել։

Հ. Բագրատյանի քննադատության թիրախներից է նաև ստվերը։ Նա բազմնիցս հայտարարել է, թե այժմ երկրում ստվերն ավելի մեծ ծավալների է հասել, քան 1996-ին էր։ Այս կապակցությամբ Գ. Մինասյանն ասաց. «Ստվերը իսկապես մեր երկրում կա, դա ցանկացած երկրի ամենամեծ պրոբլեմն է, և ամեն իշխանություն անում է ամեն ինչ, որ դա նվազեցնի։ Իսկ հարկային, մաքսային և այլ բնագավառներում տարվող բոլոր բարեփոխումները, որ առկա են մեր երկրում, միտված են հենց այդ խնդիրների լուծմանը։ Ինչ վերաբերում է 1996-ի հետ համեմատությանը, ապա դժվարանում եմ որևէ բան ասել, քանի որ չգիտեմ, թե ինչպես է Հրանտ Բագրատյանը գնահատում 1996-ի ստվերը»։