Սերժ Սարգսյանը չմեկնեց իրանյան գագաթաժողովին

Օգոստոսի 26-ին Թեհրանում մեկնարկած Չմիավորված երկրների շարժման գագաթաժողովին Հայաստանի Հանրապետության պատվիրակությունը կգլխավորի արտգործնախարար Էդվարդ Նալբանդյանը Այս մասին Lurer.com-ին հայտնեց ԱԳՆ մամուլի խոսնակ Տիգրան Բալայանը:

Հիշեցնենք՝ ավելի վաղ ենթադրություններ կային, թե իրանյան գագաթաժողովին կարող է մասնակցել ՀՀ նախագահը: Lurer.com-ն իր հրապարակամամբ կասկածի տակ էր առել ՀՀ նախագահի մակարդակով թեհրանյան գագաթաժողովին մասնակցելու նպատակահարմարությունը, ինչն, ի վերջո, տեղի չունեցավ:

Չմիավորված երկրների շարժման գագաթաժողովը մեկնարկել է օգոստոսի 26-ից և կտևի մինչև օգոստոսի 31-ը:

Հիշեցնենք՝ ԱՄՆ-ը կոչ էր արել պետությունների ղեկավարներին և ՄԱԿ-ի Գլխավոր քարտուղարին չմասնակցել իրանյան գագաթաժողովին:
Չմիավորված երկրների շարժումը (Non-Aligned Movement) ստեղծվել է 1961 թվականին Հարավսլավիայի նախագահ Տիտոյի առաջարկով և հիմքում ունեցել է երկու նպատակ՝ գաղութատիրության դեմ պայքար և պայքար ռազմական դաշինքների դեմ: Շարժման անդամ պետությունները միավորվել էին նաև Սառը պատերազմի երկրների՝ ԱՄՆ-ի և Ռուսաստանի ազդեցության դեմ:

Ըստ որոշ փորձագետների՝ Խորհրդային Միության փլուզումից հետո Չմիավորման շարժումը սպառել է իրեն, թեև կազմակերպությունը վերաիմաստավորել է նպատակները և արդեն կենտրոնանացել գլոբալիզացիայի, առևտրի և ներդրումների, միջազգային ահաբեկչության և այլ խնդիրների վրա: