Հաջորդ տարի կարձանագրվի աննախադեպ բարձր ցուցանիշ

Տարեկան  կարտոֆիլի երկու հազար տոննա սերմնացուի ներկրումը Հայաստան խթան հանդիսացավ կարտոֆիլագործության զարգացմանը, ինչն էլ նպաստեց, որ Հայաստանը ներկրող երկրից դարձավ  նաև արտահանող երկիր:

 Այսօրվա ասուլիսին այդ մասին խոսեց ՀՀ գյուղատնտեսության նախարար Սերգո Կարապետյանը, ով, կարևորելով սերմերի ներկրումը Հայաստան, շեշտեց, որ  նմանատիպ աշխատանքները միտում ունեն լուծելու նաև պարենային մի շարք խնդիրներ: Ըստ նախարարի տարեկան  արտադրվող  կարտոֆիլի քանակը հասցնելով 500 հազար տոննայի Հայաստանը    ցուցաբերեց բավականին բարձր ցուցանիշ: Նա նշեց, որ  այս տարվա բերքահավաքության ակնկալիքները մեծ են, ինչը պայմանավորված է նաև ցանքային տարածքների ավելացման հետ:

Անդրադառնալով անասնաբուծության ոլորտում արձանագրված աճի միտումներին՝ նախարարը նշեց, որ հուսալի նախադրյալների շնորհիվ առաջիկա տարիներին կապահովվի կայուն աճ: 2011 թվականի սեպտեմբերի 20-ի դրությամբ հանրապետությունում տավարի գլխաքանակը նախորդ տարվա համեմատությամբ ավելացել է 3,5  հազարով և տարեվերջին կկազմի շուրջ 575 հազար գլուխ: Այս ցուցանիշը հիմք է տալիս պնդելու, որ նախորդ տարվա համեմատ երեք հազար տոննա ավել միս կարտադրվի: Ըստ նախարարի մսի արտադրության տարեկան ցուցանիշը կկազմի 127 հազար տոննա, իսկ կաթի արտադրությունը կավելանա ավելի քան տասը հազար տոննայով: Սերգո կարապետյանը հավելեց նաև , որ այս բավականին լավ իրավիճակը հնարավորություն կտա հաջորդ տարի վերջին 15 տարիների ընթացքում արձանագրել աննախադեպ ցուցանիշ: