Ասիական զարգացման բանկը հետաքրքրված է ՀՀ ԱՌՆ ռազմավարությամբ

Այսօր ՀՀ ԱԻ նախարարի տեղակալ Հայկարամ Մխիթարյանն ընդունել է Ասիական զարգացման բանկի (ԱԶԲ) պատվիրակությանը։ Հանդիպմանը ներկա էին ԱԶԲ Հայաստանյան ներկայացուցիչ Դեյվիդ Դոլը, բանկի գլխամասի տարածաշրջանային գլխավոր տնտեսագետ Լիազիզա Սաբիրովան և խորհրդատու, աղետային ռիսկերի կառավարման մասնագետ Նեյլ Բրիթոնը։

Ներկայումս Ասիական զարգացման բանկը մշակում է Հայաստանի հետ համագործակցության հնգամյա ռազմավարություն, որի համար ճշտվում են տարբեր գերատեսչությունների առաջնահերթությունները։

Ողջունելով հյուրերին՝ փոխնախարարը նշեց, որ չնայած ԱԻՆ-ը մեր ամենաերիտասարդ նախարարություն է և կարճ ժամանակում հասցրել է արձանագրել զգալի հաջողություններ՝ մենք դեռ շատ անելիքներ ունենք և ցանկացած օժանդակություն մեզ համար շատ գնահատելի է։

- Մենք գիտենք, որ Հայաստանը խոցելի է տարբեր աղետների առումով, և այդ նպատակով մասնագետ ենք հրավիրել, որը կօգնի գնահատել իրավիճակը, որպեսզի մենք կարողանանք առավելագույնս օգտակար լինել ձեզ,- նշեց ԱԶԲ Հայաստանյան ներկայացուցիչ Դեյվիդ Դոլը։

Նեյլ Բրիթոնն իր հերթին նշեց, թե տեղյակ է, որ Հայաստանը վերջերս ընդունել է ԱՌՆ (աղետների ռիսկի նվազեցման) ազգային ռազմավարություն, և իրենք կուզենային իմանալ, թե որոնք են մեր առաջնահերթությունները։

Խոսելով ԱԻՆ կառուցվածքի ու գործունեության վերաբերյալ՝ նշվեց, որ մեր աշխատանքի հիմնական ուղղություններն են սեյսմիկ պաշտպանությունը, ճգնաժամային կառավարումը, վաղ ազդարարումը և աղետների մոնիթորինգը։

ՍՊԱԾ գործակալության պետը ներկայացրեց իրենց աշխատանքի գերակա ուղղությունները՝ սեյսմիկ վտանգի գնահատում, բնակչության ուսուցում, շենք-շինությունների սեյսմակայունության գնահատում և բարձրացում։

ԱԶԲ Հայաստանյան ներկայացուցիչ Դեյվիդ Դոլը հայտնեց, որ հայկական կողմի բարձրացված խնդիրները համահունչ են բանկի ծրագրերին և առավել մանրամասն ուսումնասիրությունից հետո կարող են ընդգրկվել իրենց նախագծերում։

Առաջարկություն եղավ նաև իրականացնել գիտելիքի և օգտակար փորձի փոխանակում՝ բանկի գործընկեր երկրների հետ։

Այցի ավարտին հյուրերը եղան նաև ԱԻՆ ճգնաժամային կառավարման կենտրոնում՝ ծանոթանալով դրա առաքելությանն ու տեխնիկական զինվածությանը։