Կոլումբիայի կառավարությունը խաղաղ բանակցություններ է վարելու ՀԿԶՈւ-ի առաջնորդների հետ

Կոլումբիայի նախագահ Ժուան Մանուել Սանթոսը հաստատել է, որ գաղտնի հանդիպումներ են տեղի ունեցել կառավարության և պարտիզանական շարժման առաջնորդների միջև՝ բանակցությունները վերսկսելու նպատակով, որոնք ընդհատվել էին 2002 թվականին: Այս մասին հաղորդում է The Guardian-ը:

Հետևելով շաբաթվա զարգացող լուրերին՝ նախագահ Ժուան Մանուել Սանթոսը երկուշաբթի գիշերը ազգային հեռուստատեսությամբ հաստատել է, որ իր կառավարությունը «հետազոտական երկխոսություններ» է նախաձեռնել ՀԿԶՈւ-ի ապստամբների հետ՝ 5 տասնամյակ տևած մասսայական գործողություններին վերջ դնելու համար:

Սանթոսը չի մատնանշել կոնկրետ պահը, բայց ասել է՝ «առաջիկա օրերին» սկզբնական բանակցություններից տվյալներ կհաղորդի: Մի քանի լրատվամիջոցներ հայտնեցին, որ երկու կողմերը կարող են ֆորմալ բանակցություններ սկսել հոկտեմբերի սկզբներին, և հանդիպման վայրը կարող է լինել Կուբան կամ Նորվեգիան:

Վենեսուելայի նախագահ Հուգո Չավեսն ասել է, որ բանակցությունների սկզբնական փուլում պատրաստվում է հանդես գալ որպես միջնորդ:

Վերջին անգամ ՀԿԶՈւ-ն խաղաղության բանակցությունների սեղանի շուրջ նստել է 1999 թվականին: Բայց 2 տարի հետո նրա հարձակումները քաղաքացների և զինվորականության վրա դարձան առավել հզոր և ընդգծված, քան երբևէ էին: Բանակցություններն ընդհատվեցին 2002-ին, երբ ՀԿԶՈւ-ն սենատոր առևանգեց:

«Մենք պատրաստվում ենք դասեր քաղել անցյալից»,- ասել է Սանթոսը՝ պարզորոշ մատնանշելով ավարտված բանակցությունները: «Ցանկացած (խաղաղ) գործընթաց պետք է հանգեցնի հակամարտության ավարտին, այլ ոչ թե երկարացնի այն»,- ասել է նա:

Երկրի երկրորդ ամենամեծ պարտիզանական խումբը՝ Ազգային ազատագրական բանակը, Reuters-ին փոխանցել է, որ կմիանա ՀԿԶՈւ-ին՝ կառավարության հետ խաղաղ բանակցություններում: