«Առավոտ». «Ժառանգության» թիմը չի երևում

ՀՀ Մարդու իրավունքների առաջին պաշտպան, «Ժառանգություն» խմբակցության նախկին պատգամավոր Լարիսա Ալավերդյանը «Կենտրոն» հեռուստատեսության «Ուրվագիծ» հաղորդման ժամանակ նշել է, որ հիսաթափվել է իր կուսակցության որդեգրած մարտավարությունից. «Ժառանգությունը» որդեգրել է ինձ համար խորթ քաղաքականություն: Այն մեթոդները, որ կարող է օգտագործել որևէ խոշոր կուսակցություն' իրեն կարող են քննադատել, դատապարտել և այլն, դա նրան չի սասանում, չպիտի օգտագործի փոքր կուսակցությունը, դա ինձ համար օտար մեթոդիկա է»: Տիկին Ալավերդյանը նաև ափսոսանքով է նկատել, որ թերևս պետք էր պահպանել «փոքրերի» միակ զենքը' ազնվորեն բոլոր երևույթներին արձագանքելը:

Այս առնչությամբ «Առավոտի» հետ զրույցում «Ժառանգություն» կուսակցության անդամ Ստեփան Սաֆարյանը վստահեցրեց, որ Լարիսա Ալավերդյանը իր այդ կարծիքը «Ժառանգության» քաղաքականության մասին մշտապես է ասել. «Նախընտրական շրջանում նա իր այդ դիրքորոշումը շատ հստակորեն ասել է կուսակցության ներսում, ինչպես նաև իրեն իրավունք է վերապահել ասել դա նաև հրապարակավ»: Թերթը պարոն Սաֆարյանից հետաքրքրվեց' Դուք է՞լ եք կիսում այդ տեսակետը, համաձա՞յն եք նրա հետ: Նա պատասխանեց. «Ի գիտություն եմ ընդունում բոլոր տեսակետները և գտնում եմ, որ դեռևս ժամանակ կա համոզվելու, թե որքանով ճիշտ որոշումներ ենք կայացրել գոնե նախընտրական շրջանում: Այս կապակցությամբ ես թերևս ժամանակի քննությանը կսպասեմ: Ոչ երկար ժամանակով, բայց բոլոր դեպքերում կսպասեմ' համոզվելու համար, թե որ տեսակետն էր ճիշտ, այնուամենայնիվ»:

«Ժառանգություն» կուսակցության մեկ այլ անդամի' Անահիտ Բախշյանի դիտարկմամբ' «Լարիսան ազատ է մեկնաբանությունների մեջ, ինքը կուսակցության անդամ չէ: Ես կուսակցության անդամ եմ: Ես նաև մասնակցել եմ այդ քվեարկություններին, կողմ եմ եղել, թե ձեռնպահ, բայց մասնակցել եմ: Այսինքն՝ կուսակցությունն ինչ որոշում կայացրել է' ես դրան մասնակցել եմ: Հետևաբար ես չեմ կարող այդ գնահատականները տալ, ինչ տիկին Լարիսան: Ես ինչ-որ տեղ համաձայն չեմ այնքանով, որքանով ես դրան մասնակից եմ»: Ինչ վերաբերում է Լարիսա Ալավերդյանի այն կարծիքին, որ պետք էր պահպանել փոքր կուսակցությունների միակ «զենքը»' ազնվորեն բոլոր երևույթներին արձագանքելը, տիկին Բախշյանը չհամաձայնեց. «Բոլոր երևույթներին էլ արձագանքում է, ուղղակի ինքը երևի նկատի ունի «Վահե Ավետյան» հասարակական շարժումը, «Ժառանգությունն» արձագանքել է իր հայտարարություններով: Բայց առաջ դա մենք այլ ձևով էինք անում: Հիմա առանձին-առանձին կուսակցության կողմից հայտարարություն է արվում, այնպիսի տպավորություն է, որ կուսակցությունից գնացող չլինի: Առաջ այդպես չէր»:

«Առավոտ»-ի դիտարկմանը, որ առաջ «Ժառանգությունը» առաջին գծում պայքարողներից է եղել' Անահիտ Բախշյանը պատասխանեց. «Հիմա էլ: Ես էլ եմ գնացել, Ստյոպան էլ է գնացել, Զարուհին էլ է գնացել, բայց' առանձին-առանձին: Թիմը, թիմային աշխատանքը չի երևում, որովհետև խմբակցությունը հիմա այլ կորիզ ու այլ անդամներ ունի: Սա է տարբերությունը, իսկ փոքր կուսակցությանը հատուկ ազնվություն ասելով' ինքը նկատի ուներ անցած 5 տարիներին մեր խմբակցության վարքը' Ազգային ժողովում: Այսօր չգիտենք' կարո՞ղ է նույնը լինի, կապրենք' կտեսնենք»: